Tơ̆ jơ tơƀâp dôm bơngai tang măt đei mơ̆ng nơ̆r roi tơbăt rim tơdrong lơ̆m apŭng plenh tĕh păng tơ̆ tơring, dôm tơdrong jang đei ‘lơ̆ng hơiă lơ̆m tơdrong jang atŏk tơiung mŭk drăm kơ dêh char Dak Lak sơnăm 2022, trong vă jang tŏk lơ̆m sơnăm 2023 păng dôm sơnăm đơ̆ng rŏng dơ̆ng. 

Sơnăm 2022, tơdrong jang mŭk drăm, tơpôl kơ dêh char Dak Lak jang tŏk dơ̆ng ‘lơ̆ng păng iŏk đei lơ tơdrong jơ nei lơ̆m rim tơdrong. Vă rim tơdrong hơgăt tơm kiơ̆ tơdrong tơchơ̆t đei tơlĕch hlôi jang đei ngăl. Sơnăm 2023, Dak Lak adrin atŏk tơiung mŭk drăm dang 8% pơtêng hăm tơdrong pơhlom vă bơ̆ jang lơ̆m sơnăm 2022.

Pơma tơ̆ jơ tơƀâp, ƀok Võ Văn Cảnh, Phŏ Kơdră vei lăng kon pơlei dêh char Dak Lak pơma hơdăh: vă gơ̆h jang đei dôm tơdrong ‘nâu, hơdai hăm tơdrong tơgŭm, kăl đei hloi đon pơhnŏng tôch ai lơ̆m tơdrong chĕp kơ̆l pơgơ̆r, tơlĕch jang đơ̆ng dôm anih jang đảng, khul kơdră tơring, kon pơlei păng khul linh dêh char. Atŭm hăm ‘nŏh, kơdră chĕp kơ̆l dêh char hơpơi ‘mĕh hơnơ̆ng iŏk đei tơdrong tơrĕk hlŏh dơ̆ng đơ̆ng đe kăn ƀô̆ pơm tih kơ khul linh vă Dak Lak jăh jang kĕh dôm tơdrong hơgăt jang tŏk mŭk drăm, tơpôl đei tơlĕch.