Pơgê năr 9/7, tơ̆ Hà Nội, Hơnih chĕp pơgơ̆r tơplih kơsô̆ lơ̆m rim hơnih bơ̆ jang Đảng pơgơ̆r hop akŏm lăng hơlen pơtôch 6 khei blŭng sơnăm păng tơlĕch tơdrong jang lơ̆m khei năr kơnh. Iung pơma pơrô̆ jang, Kơdră chĕp pơgơ̆r Ban Bí thư Trần Cẩm Tú athei tĕnh koăng hơmet pơ ‘lơ̆ng tơdrong tơhlăk tơhlĭn lơ̆m jơ ‘năr kăl mưh iŏk yoa ư̆ng yŭng “Sổ tay đảng viên điện tử”.

Tơbăt tơ̆ hop akŏm tơƀôh hơdăh, bơ̆ jang tơplih kơsô̆ lơ̆m rim hơnih bơ̆ jang Đảng đei lơ trong tơplih hơ iă găh pơm pơkeh trong bơ̆ jang, pơjing đei hơyak păng tơlĕch pơjing đei trong jang iŏk yoa atŭm. Mă lei, tơdrong iung jang mĭnh ƀar hơnih oei hiơ hiơ̆, ưh kơ gan ‘lơ̆ng hơ iă. Khul kơdră chĕp pơgơ̆r Ban Bí thư pơjao ăn Hơnih bơ̆ jang ănTrung ương Đảng hrôih pơjing trong jang tơplih kơsô̆ kâp dêh char, kâp tơring; adoi iung jang hơdoi hăm rim hơnih, bơngai iŏk jang hơmet pơ ‘lơ̆ng rim tơdrong tơhlăk tơhlĭn kih thuơ̆t, hơmet pơ ‘lơ̆ng vă plôih lăng ƀônh kmăi kmŏk hơlen bơ̆ jang.