VOV4.Bahnar - Lơ̆m ƀar năr, năr 2 păng 3/8, lơ̆m ‘măng năm tơmang păng bơ̆ jang tơ̆ Hàn Quốc, Kơdră chĕp pơgơ̆r Ban bí thư Võ Văn Thưởng hăm Khŭl tang măt Kơdră Đảng Cộng sản Việt Nam hlôi đei lơ tơdrong jang pơma dơnŭh, tơ ƀơ̆p rim Kơdră Hàn Quốc, lơ̆m au ‘măng tơ ƀơ̆p pơma dơnŭh hăm Kơdră chĕp pơgơ̆r Kuô̆k hô̆i Hàn Quốc Kim Jin Pyo, Dơnŏ anĭh chĕp pơgơ̆r kơ Đảng chĕp pơgơ̆r Jơhngơ̆m pran Tĕh đak kon pơlei tơ̆ Kuô̆k hô̆i, Khŭl Nghĭ si tơgoăt tơgoăl Hàn - Việt, Khŭl jang hơdoi mŭk drăm-jŏh ayŏ Hàn Việt, Khŭl dôm bơngai Hàn Quốc hưch hanh Việt Nam. Tơ̆ ‘măng tơ ƀơ̆p pơma dơnŭh hăm Kơdră chĕp pơgơ̆r Kuô̆k hô̆i Kim Jin Pyo hăm rim hơnĭh bơ̆ jang kơ Hàn Quốc, ƀok Võ Văn Thưởng sơkơ̆t hơdăh, trong jang atŏk kơtang tơgoăt tơgoăl hăm Hàn Quốc hlôi đei Tổng Bí thư Nguyễn Phú Trọng pơma hơdăh tơ̆ ‘măng pơma đam trư̆k tuyên hăm Ƀok Kơdră tơm Hàn Quốc Yoon Suk Yeol; athei Kơdră chĕp pơgơ̆r Kuôk hô̆i Kim Jin Pyo tơgŭm djru tơdrong ƀar tĕh đak hơnơ̆ng atŏk kơtang tơgoăt tơgoăl jang hơdoi chĭnh trĭ ‘moi kiơ̆ tơ ƀơ̆p pơma dơnŭh rim khŭl, atŏk kơtang jang hơdoi mŭk drăm, mơdro sa păng tơmơ̆t jên jang.

Tơblơ̆ nơ̆r: Amazưt