VOV4.Bahnar -  Hơnơ̆ng iung năm ngôi păng Hmach Têt ăn Khŭl Đảng, Khŭl kơdră chĕp pơgơ̆r păng kon pơlei dêh char Quảng Ngãi, kơsơ̆ năr 17/1, Kơdră chĕp pơgơ̆r Ban Bí thư Võ Văn Thưởng atŭm hăm khŭl bơ̆ jang Trung ưpng hlôi vang năm chơt hơ iă tơdrong pơgơ̆r “Têt chơt hơ iă-Puih mak sơđơ̆ng 2022” păng pôk tơmam drăm têt ăn kơ hrĕng kŏng nhân Hơnĭh jang Kmăi kmŏk pơm tơlĕch tơmam drăm VSIP Quảng Ngãi, tơ̆ tơring Tịnh Phong, apŭng Sơn Tịnh; Tơ ƀơ̆p mŭh măt, hmach Têt ăn kang ƀô̆, bơngai jang kơ Kŏng ty Pơm tơlĕch đak dau Bình Sơn, Hơnĭh jang Mŭk drăm Dung Quất. Têt sơnăm au, Jơnŭm vei lăng Tơdrong jang dêh char Quảng Ngãi tơlĕch jang vei lăng năng tông hăm hơnăn “Têt chơt hơ iă-Puih mak Sơđơ̆ng 2022” hăm trong đĭ đăng bơngai jang jei đei sa Têt. Hlŏh đơ̆ng au, Kŏng đoàn rim hơnĭh hlôi tơgŭm ăn vă jê̆ 65.000 ‘nu bơngai jang hăm kon jên hlŏh 19 ti hlak jên; chă hơvơn tơgŭm djru 700 ‘nu bơngai jang, khul jang rôp ka hơdang hăm kon jên 700 trĭu hlak jên, pôk ăn 25 pơbung hnam Tơnŏ Kŏng đoàn hăm kơ jă kơ jên 1 ti hlak jên. Vang năm chơt hơ iă ‘măng pơgơ̆r “Têt chơt hơ iă-Puih mak sơđơ̆ng 2022”, Kơdră chĕp pơgơ̆r Ban Bí thư Võ Văn Thưởng hôn bơnê kơtang trong tơchăr đơ̆ng Dơnŏ anĭh tơm vei lăng Tơdrong jang Việt Nam lơ̆m tơdrong vei hơnơ̆ng 7 sơnăm pơgơ̆r Têt chơt hơ iă roi năr roi kơtang, tơgŭm djru ‘lơ̆ng hơ iă, vei lăng năng tông tơdrong erĭh sa ăn bơngai jang lơ̆m khei năr Têt.

Tơblơ̆ nơ̆r: Amazưt