VOV4. Bahnar - Lăng trŭh tơbăt Năr Ƀok thây pơgang Việt Nam năr 27/2, pơgê năr 21/2, ƀok Nguyễn Trọng Nghĩa, Bí thư Trung ương Đảng, Kơdră chĕp pơgơ̆r Ban Tuyên giáo Trung ương trŭh năm ngôi hmach chơt hơ iă ăn rim ƀok thây pơgang Hnam pơgang Trung ương Quân đội 108, Hnam pơgang Hơmet jĭ Tơsŏh Trung ương păng năm ngôi Giáo sư, Tiến sĩ Vũ Văn Đính bơngai pơjing Hơnĭh jang Hơmet jĭ ăl Việt Nam. Hôn bơnê dôm tơdrong hơdrin tơgop tĭh tên đơ̆ng khŭl ƀok thây pơgang Hnam pơgang Trung ương Quân đội 108, Hnam pơgang Hơmet jĭ Tơsŏh Trung ương adoi nhen hơnĭh jang pơgang lơ̆m tĕh đak hlôi păng tŏk bok iung jang tang găn jĭ hơbŭh, ƀok Nguyễn Trọng Nghĩa pơma hơdăh, ‘nau jing tơdrong tơgop tĭh tên ăn hơdrĕch hơdrung. Lơ ƀok thây pơgang hlôi plang akau po vă iung tơ jră hăm jĭ hơbŭh Covid-19. Pơtrŭh nơ̆r hmach chơt hơ iă ăn rim ƀok thây pơgang ƀlep Năr Ƀok thây pơgang Việt Nam, ƀok Nguyễn Trọng Nghĩa athei pơ đĭ hơnĭh jang hơnơ̆ng jang ‘lơ̆ng Tơdrong tơchơ̆t Trung ương 6 jăl 12 găh hơnơ̆ng tơplĭh ‘nao hơnĭh jang, vei lăng, atŏk kơtang bơ̆ jang ‘lơ̆ng kơ rim bơ̆ jang tĕh đak.

Tơblơ̆ nơ̆r: Amazưt