VOV4.Bahnar - Pơgê năr 21/1, tơ̆ Tây Ninh, ƀok Nguyễn Trọng Nghĩa, Kơdră chĕp pơgơ̆r Ban Tuyên giáo Trung ương atŭm hăm khŭl bơ̆ jang hlôi năm hơpong pơsat ƀô̆ đô̆i; năm ngôi hăm Sư đoàn 5, năm ngôi păng pôk tơmam drăm ăn rim ŭnh hnam đei iŏk yua ăn tĕh đak, ŭnh hnam dơnŭh, bơngai tơnap tap tơ̆ tơring Thái Bình, apŭng Châu Thành. Tơ̆ tơring Thái Bình, apŭng Châu Thành, Kơdră chĕp pơgơ̆r Ban Tuyên giáo Trung ương hlôi pôk ăn 40 tơnô̆ tơmam drăm ăn ŭnh hnam dơnŭh, kon pơlei tơnap tap kơ yuơ jĭ hơbŭh Covid-19. Pơma dơnŭh hăm kon pơlei păng kang ƀô̆ rim tơring, ƀok Nguyễn Trọng Nghĩa tơbăt, bơ̆ jang vei lăng erĭh sa, vei lăng năng tông ăn bơngai dơnŭh, tơnap tap đei kơdră chĕp pơgơ̆r Đảng păng Tĕh đak lăng ba kơ jăp, mă kăl lơ̆m khei năr Têt trŭh puih mak vih. Kơsơ̆ năr 21/1, ƀok Nguyễn Trọng Nghĩa hơnơ̆ng năm ngôi, pôk tơmam drăm ăn kŏng nhân jang tơ̆ hơnĭh jang kmăi kmŏk pơm tơlĕch tơmam drăm tơ̆ apŭng Gò Dầu, dêh char Tây Ninh.

Tơblơ̆ nơ̆r: Amazưt