VOV4. Bahnar - Drung kơsơ̆ năr 25/5, tơ̆ Hnam Kuô̆k hô̆i, Kơdră chĕp pơgơ̆r Đảng păng Tĕh đak hlôi tơ ƀơ̆p mŭh măt Kơdră tang măt Kuô̆k hô̆i ‘nŏh bơngai kon kông jăl XV.

Iung pơma tơ̆ jơ tơ ƀơ̆p, Kơdră chĕp pơgơ̆r Kuô̆k hô̆i Vương Đình Huệ pơma hơdăh, Đảng păng Tĕh đak hơnơ̆ng sơkơ̆t hơdăh tơgoăt tơgoăl pôm nơ̆r ƀơ̆r đon hơdrĕch hơdrung ‘nŏh gĭt kăl hlŏh hăm tĕh đak bơ̆n, mĭnh tĕh đak rơngei keh kong kơ 54 hơdrĕch hơdrung ‘nhŏng ŏh erĭh sa atŭm, ling lang sơkơ̆t hơdăh tơdrong tơ iung pơjing trong bơ̆ jang tơgoăt tơgoăl hơdrĕch hơdrung, ‘moi kiơ̆ hơtŏ hơnơ̆ng, tơgoăt kơ jăp, yom kiơ̆ păng tơgŭm dĭh băl vang atŏk tơ iung. Kơdră chĕp pơgơ̆r Kuô̆k hô̆i Vương Đình Huệ ‘mĕh vă rim Kơdră tang măt Kuô̆k hô̆i ‘noh bơngai kon kông lăng ba kơ jăp trong bơ̆ jang sơđơ̆ng jang kiơ̆ jơnei rim trong tơlĕch jang đơ̆ng Tĕh đak tơ̆ tơring groi kông, tơring sơlam tĕh đak, tơring kon kông atŏk tơ iung tĕnh koăng găh mŭk drăm, oei sa, jŏh ayŏ, tơpôl, kơ jăp iăp kơtang găh sơđơ̆ng, vei lăng tĕh đak, vang mơ̆t hơdoi hăm tơdrong atŏk tơ iung atŭm kơ pơ đĭ lơ̆m tĕh đak, tơgăl hăm hơnĭh gĭt kăl kơ tĕh đak.

Tơblơ̆ nơ̆r: Amazưt