VOV4.Bahnar - Pơgê năr 27/4, ƀlep lơ̆m năr tơbăt 47 sơnăm Năr rơnegi tơring Pơbăh, tĕh đak rơngei hiôk hian (30/4/1975 - 30/4/2022), Khŭl kơdră tang măt Dơnŏ anĭh chĕp pơgơ̆r Trung ương Đảng, Kơdră chĕp pơgơ̆r Tĕh đak, Kuô̆k hô̆i, Khŭl kơdră tĕh đak, Dơnŏ anĭh Trung ương Mặt trận Tổ quốc Việt Nam atŭm hăm tang măt rim hơnĭh tơm, hơnĭh jang Trung ương păng pơlei tơm Hà Nội hlôi glơng ming gơvang pơkao, mơ̆t hơpong pơsat Ƀok Hô. Tơ̆ hơnăp yang hơbang Ƀok Hô, Khŭl kơdră tang măt hlôi tơbăt jơhngơ̆m đon hôn bơnê, ƀlŏk hơdơ̆r tôch bach dôm tơdrong tơgop tĭh tên đơ̆ng Ƀok Hô hăm tơdrong jang kĕch mang kơ Đảng păng hơdrĕch hơdrung bơ̆n. Ƀok Hô hlôi plang đĭ jơhnơr ăn kon pơlei, ăn tĕh đak, chĕp pơgơ̆r Đảng bơ̆n, kon pơlei bơ̆n iung jang iŏk đei jơnei nuih mơng. Gơvang pơkao đơ̆ng Khŭl đei chĭh chư: "Ling lang ƀrŏk hơdơ̆r hôn bơnê kơ Ƀok Hô nuih mơng gơ̆h hơgei”. Kiơ̆ đơ̆ng rŏng ‘nŏh, Khŭl tang măt hlôi ming gơvang pơkao, sŏh hlôt nhang tơbatw jơhngơ̆m đon ‘mêm kơ eng kơ rim Ƀô̆ đô̆i nuih mơngpran kơtang lôch dŏng tĕh đak tơ̆ Hơnĭh man tơbăt rim Ƀô̆ đô̆i nuih mơng pran kơtang tơ̆ trong Bắc Sơn.

Tơblơ̆ nơ̆r: Amazưt