VOV4.Bahnar - Drung kơsơ̆ năr 13/6, tơ̆ Hnam Kuô̆k hô̆i, Kơdră chĕp pơgơ̆r Đảng, Tĕh đak tơ ƀơ̆p mŭh măt rim Kơdră tang măt Kuô̆k hô̆i jăl XV ‘nŏh dôm Bơngai jang Khoa hŏk.

Iung pơma tơ̆ jơ tơƀơ̆p mŭh măt, Kơdră chĕp pơgơ̆r Kuô̆k hôi Vương Đình Huệ pơma hơdăh, khei năr au ki, rim bơngai khoa hŏk tĕh đak bơ̆n lơ̆m khŭl kơdră tang măt Kuô̆k hôi hlôi đei lơ tơdrong tơgop lơ̆m atok tơ iung khoa hŏk păng kmăi kmŏk, mŭk drăm, tơpôl, vei lăng sơđơ̆ng kơ tĕh đak. Găh tơdrong jang, rim bơngai khoa hok lơ̆m khŭl kơdră tang măt Kuô̆k hô̆i hlôi atŭm hăm Kuô̆k hô̆i hơdrin tơgop lơ̆m pơm pơkeh trong bơ̆ jang, trŏ lăp hăm tơdrong ‘mĕh vă jang kiơ̆, atŏk tơ iung khoa hŏk păng kmăi kmŏk. Hăm tơdrong lui kơ jăp lơ̆m jơhngơ̆m đon gơ̆h hơgei păng jơhngơ̆m đon tơpăt đơ̆ng rim bơngai khoa hŏk jang lơ̆m Khŭl kơdră tang măt Kuô̆k hô̆i, Kơdră chĕp pơgơ̆r Kuô̆k hô̆i hơmŏ akhan, mă đơ̆ng kơchư̆k ayơ, hăm hơnăp jang kơ bơngai tang măt kon pơlei; hăm jơhngơ̆m đon gơ̆h hơgei đơ̆ng bơngai khoa hŏk; hăm tơdrong hơdrin kơtang hơmet pơ ‘lơ̆ng tơnap tap kơ bơngai Việt Nam, gô hơnơ̆ng đei tơdrong tơgop tơgăl lơ̆m tơdrong atŏk tơ iung kơ tơdrong jang khoa hŏk păng kmăi kmŏk kơ tĕh đak.

Tơblơ̆ nơ̆r: Amazưt