VOV4.Bahnar - Sơng iŏk nơ̆r krao hơvơn đơ̆ng Kơdră jang tơbôl Bùi Thanh Sơn, Kơdră jang tơbôl tĕh đak Panama Érika Mouynes iung năm tơmang tĕh đak Việt Nam đơ̆ng năr 05 - 06/4/2022. Tơ̆ Hnam tơmoi Khŭl kơdră chĕp pơgơ̆r tĕh đak, Kơdră jang tơbôl Bùi Thanh Sơn hlôi pơma đam hăm Kơdră jang tơbôl Érika Mouynes. Ƀar păh hlôi tơbăt dĭh băl găh tơdrong lơ̆m tĕh đak tơjê̆ au; lăng hơlen tơdrong păng pơma dơnuh rim tơdrong atŏk kơtang jang hơdoi lơ̆m rim tơdrong jang chĭnh trĭ, jang tơbôl, mŭk drăm, mơdro sa, chŏh jang sa …adoi nhen jang hơdoi lơ̆m hop akŏm apŭng plĕnh tĕh, lơ pang. Ƀar ‘nu kơdră jang tơbôl pơma tơbăt jơhngơ̆m đon ‘mĕh vă atŏk kơtang jang hơdoi ƀar tĕh đak lơ̆m rim tơdrong jang ‘nao oei đei lơ tơdrong hơ iă nhen tơdrong chơ choĕn tơmam drăm kiơ̆ trong đak dơsĭ, iung tơ jră tang găn tơplĭh tŏ ‘mi kial, jang ŭnh hơyŭh ...; adoi tơbăt dĭh băl păng drơ̆ng mĭnh nơ̆r trong bơ̆ jang xek tơlang tơdrong tơgar dĭh băl apŭng plĕnh tĕh kiơ̆ trong rơngei hiôk hian ‘moi kiơ̆ khôi luơ̆t apŭng plĕnh tĕh.

Tơblơ̆ nơ̆r: Amazưt