VOV4. Bahnar - Drơ̆ng kiơ̆ nơ̆r krao hơvơn đơ̆ng Kơdră chĕp pơgơ̆r Kuô̆k hô̆i Vương Đình Huệ, Kơdră chĕp pơgơ̆r Hạ nghị viện Cộng hòa Ấn Độ Om Birla chĕp kơ̆l Khul kơdră tang măt Nghị viện Cộng hòa Ấn Độ iung năm tơmang Việt Nam đơ̆ng năr au, năr 19/4 trŭh năr 21/4.

‘Măng năm tơmang đơ̆ng Kơdră chĕp pơgơ̆r Hạ nghị viện Ấn Độ tơ̆ Việt Nam tơgop atŏk kơtang tơgoăt tơgoăl gĭt kăl tôm tong ƀar păh tĕh đak, atŏk kơtang tơgoăt tơgoăl jang hơdoi hăm Kuô̆k hô̆i Việt Nam; tơgoăt dơ̆ng tơdrong jơnei ‘măng năm tơmang Ấn Độ sơnăm 2021 đơ̆ng Kơdră chĕp pơgơ̆r Kuô̆k hô̆i Vương Đình Huệ; tơ ƀơ̆p hăm kon pơlei Ấn Độ tŏk bŏk erĭh sa, mơdro sa păng tơmơ̆t jên jang tơ̆ Việt Nam. ‘Măng năm tơmang Việt Nam đơ̆ng Kơdră chĕp pơgơ̆r Hạ nghị viện Ấn Độ ‘măng mă au gô jing hơyak tơm hlŏh ăn tơgoăt tơgoăl Jang sa hơdoi tôm tong Việt Nam - Ấn Độ lơ̆m khei ‘năr ƀar tĕh đak tŏk bŏk pơgơ̆r tơbăt 50 sơnăm pơjing tơbôl lơ̆m sơnăm 2022.

Tơblơ̆ nơ̆r: Amazưt