VOV4.Bahnar - Lơ̆m ‘măng iung năm tơmang Việt Nam, kơsơ̆ năr 22/6, Kơdră chĕp pơgơ̆r Kuô̆k hô̆i Cộng hoà Mozambique păng Khŭl kơdră kơpal Kuô̆k hô̆i Mozambique hlôi năm ngôi păng bơ̆ jang hăm pơlei tơm Cần Thơ. Pơma dơnŭh hăm Bí thư Đảng pơlei tơm Cần Thơ, Kơdră chĕp pơgơ̆r Kuô̆k hô̆i Cộng hoà Mozambique hôn bơnê kơtang găh tơdrong tơgoăt tơgoăl ‘lơ̆ng hơ iă ƀar păh Kuô̆k hôi ƀar tĕh đak Việt Nam păng Mozambique ‘moi kiơ̆ Hla bơar ƀlŏk hơdơ̆r găh jang hơdoi ƀar păh Kuô̆k hô̆i Việt Nam păng Kuô̆k hô̆i Mozambique. Găh tơdrong jang hơdoi lơ̆m khei năr kơnh, ƀok Lê Quang Mạnh, Bí thư Đảng pơlei tơm Cần Thơ tơbăt, drơ̆ng nơ̆r chă pơtho tơbăt trong jang hơ iă lơ̆m rong ka hơdang păng chŏh jang sa, tơdrong pơm tơlĕch, atŏk đei iŏk yua lơ păng ‘lơ̆ng kơ rim tơmam drăm chŏh jang sa, ka hơdang; Jang hơdoi tơmơ̆t jên jang atŏk tơ iung pơm tơlĕch hơdrĕch ‘long pơtăm, rong kon tơrong păng ka hơdang ‘lơ̆ng,  tơ iung pơjing tơring jang ƀa ‘lơ̆ng kiơ̆ trong chŭn na să, pơjing tơring rong kon tơrong rơgŏh ‘lơ̆ng ư̆h kơ đei pơrang jĭ, jang hơdoi tơbăt dĭh băl lơ̆m pơm tơlĕch, mong răk, vei lăng tơmam drăm chŏh jang sa, atŏk kơ jă tơmam drăm chŏh jang sa tơm, jang hơdoi tĕch mơdro dĭh băl tơmam drăm chŏh jang sa.

Tơblơ̆ nơ̆r: Amazưt