Vang năm păng iung pơma tơ hop akŏm, Kơdră chĕp pơgơ̆r Kuô̆k hô̆i Trần Thanh Mẫn pơkă, Jơnŭm vei lăng kon pơlei kơ pơlei tơm Hà Nội hơnơ̆ng atŏk kơtang jơhngơ̆m đon tơplih ‘nao lơ̆m bơ̆ jang, kăl jing “rup hơdăh ang rang ‘lơ̆ng” kơ Jơnŭm vei lăng kon pơlei rim dêh char, pơlei tơm lơ̆m teh đak. Tơplih ‘nao jơhngơ̆m đon lơ̆m tơ iung pơjing khôi luơ̆t, pơm hơtŏk bơ̆ jang ‘lơ̆ng, jơnei lăng hơlen, tơchơ̆t rim tơdrong kăl mă hơnih gơ̆h jang. Kơdră chĕp pơgơ̆r Kuô̆i athei, ‘Măng hop akŏm mă ou kơ Jơnŭm vei lăng kon pơlei kơ pơlei tơm gô jing ‘Măng hop akŏm jơ ‘năr hle, pơjing đei jơhngơ̆m pran kơtang, kơrun đĭ au, tơtom hơmet pơ ‘lơ̆ng tơnap tap, akŏm atŏk tơ iung mŭk drăm-tơpôl, sơđơ̆ng teh đak păng sơđơ̆ng dơ̆ng kơjăp păng atŏk kơtang hơrih sa kơ Kon pơlei Hơnih tơm, tơgop kơtang lơ̆m ‘măng tơplih ‘nao. Kiơ̆ kơ ‘noh, Hà Nội kăl akŏm tơlĕch jang hơdrol găh khul jang, pơjing hơyak pran hloh dơ̆ng găh trong hnam, gơ̆h hơgei hloh, kơjăp ‘lơ̆ng hloh; akŏm vei lăng pơprŏ jang tơklep hăm rim trong pơprŏ jang tơlĕch jang kiơ̆ lơ̆m rim tơdrong jang mŭk drăm, jŏh ayŏ, tơpôl…