‘Măng iung năm tơmang Australia đơ̆ng Kơdră chĕp pơgơ̆r Kuô̆k hô̆i Vương Đình Huệ gô pơtrŭt kơtang hlŏh dơ̆ng tơgoăt tơgoăl ƀar păh Kuô̆k hôi/Nghĭ viên ƀar tĕh đak păng đei hơyak atŏk pran ‘nao, pơ̆ih trong hơmŏ, pơjing jơhngơ̆m pran ‘nao ăn jang hơdoi roi năr roi tơpă, jơnei ƀar păh tĕh đak lơ̆m rim tơdrong, hơnhăk đei iŏk yua tơpă ăn kon pơlei ƀar tĕh đak.

Khei năr au ki, tơgoăt tơgoăl ƀar tĕh đak hlôi atŏk tơ iung ‘lơ̆ng, mă kăl đơ̆ng mă ƀar tĕh đak pơjing Tơgoăt tơgoăl jang hơdoi Gĭt kăl lơ̆m sơnăm 2017. Tơgoăt tơgoăl chĭnh trĭ roi năr roi tơklep, lui kiơ̆ dĭh băl ‘moi kiơ̆ chă tơƀơ̆p, pơma dơnŭh dih băl khŭl kơdră kơpal kơ: Đảng, Kuô̆k hô̆i păng Khŭl kơdră tĕh đak, kon pơlei yak năm ngôi dĭh băl. Jang hơdoi lơ̆m rim tơdrong jang mŭk drăm, mơdro sa, tơmơt jên jang đei atŏk tơ iung ‘lơ̆ng. Tĕch mơdro dĭh băl ƀar păh tŏk lơ mă đơ̆ng đei ƀơm kơnê̆ đơ̆ng jĭ hơbŭh Covid-19 pơm ăn: sơnăm 2021 iŏk đei 12,4 tỷ USD, tŏk vă jê̆ 50% pơtêng hăm sơnăm 2020; Australia ling lang ‘măn ăn Việt Nam kon jên jang ODA sơđơ̆ng. ‘Nao au, Australia tơbăt hơdăh kon jên jang tĕh đak jăl jang 2022-2023, kiơ̆ kơ ‘nŏh, boăl atŏk ODA ăn Việt Nam jing 92,8 triu AUD.