VOV4.Bahnar - Ƀlep lơ̆m năr bơ̆ jang blŭng a kơ sơnăm ‘nao Nhâm Dần, pơgê năr 7/2, tơ̆ Hnam Kuôk hô̆i, Kơdră chĕp pơgơ̆r Kuô̆k hô̆i Vương Đình Huệ hăm rim Kơdră chĕp pơgơ̆r Kuô̆k hô̆i hlôi tơ ƀơ̆p mŭh măt, pơjao tơdrong jang ăn rim Kơdră tang măt Kuô̆k hô̆i, kang ƀô̆, bơngai jang kơ Dơnŏ anĭh bơ̆ jang Kuô̆k hô̆i. Iung pơma tơ̆ jơ tơ ƀơ̆p muh măt, Kơdră chĕp pơgơ̆r Kuô̆k hô̆i Vương Đình Huệ pơma hơdăh, tơdrong hơpơi ‘mĕh vă nuh mơng pran kơtang, gôchang gơnang yoa lơ̆m rim trong tơlĕch jang kăl, lơ̆m au đei trong tơlĕch jang kăl găh trong chĕp pơgơ̆r. Kơdră chĕp pơgơ̆r Kuô̆k hô̆i Vương Đình Huệ tơbăt găh ‘măng năm hmach Têt Nguyên đán đơ̆ng Kơdră chĕp pơgơ̆r Kuô̆k hô̆i hăm rim khŭl bơ̆ jang tơ̆ 6 dêh char găh Pơbăh păng rim tơdrong jang đơ̆ng rim Kơ iĕng Kơdră chĕp pơgơ̆r kuôk hô̆i. Kơdră chĕp pơgơ̆r Kuô̆k hô̆i Vương Đình Huệ athei, găh bơ̆ jang dăr lăng, lăp đơ̆ng rŏng Têt Nguyên đán hloi, rim kơdră Khŭl jang dăr lăng kăl iung jang mă brĕ vă jang 4 tơdrong jang dăr lăng tơm mă Kuô̆k hô̆i tơlĕch ăn; adoi dăr lăng 107 trong vă jang lơ̆m Tơdrong iung jang kơ Đảng khŭl Kuô̆k hô̆i pơm kiơ̆ Tơdrong tơchơ̆t Pơm lêh hop akŏm mă XIII kơ Đảng păng 137 tơdrong jang pơjing khôi luơ̆t kiơ̆ nơ̆r pơtôch 19 đơ̆ng Dơnŏ anĭh tơm Chĭnh trĭ păng Tơdrong vă jang Pơchŏh trong tơ iung pơjing khôi luơ̆t jăl jang Kuô̆k hô̆i jăl XV.

Tơblơ̆ nơ̆r: Amazưt