VOV4.Bahnar - Drung kơsơ̆ năr 10/8,  tơ̆ Hnam Kuô̆k hô̆i, Kơdră chĕp pơgơ̆r Kuô̆k hô̆i Vương Đình Huệ hlôi sơng pơma dơnŭh hăm Bí thư Trung ương Đảng, Bí thư Đảng pơlei tơm, Kơdră chĕp pơgơ̆r Jơnŭm vei lăng kon pơlei Hơnĭh tơm Viêng Chăn chĕp kơ̆l Khŭl Kơdră tang măt Hơnĭh tơm Viêng Chăn A-nụ-phạp Tu-na-lom năm tơmang păng bơ̆ jang tơ̆ Hơnĭh tơm Hà Nội.

Tơ̆ jơ sơng pơma dơnŭh, ƀar păh pơma hơdăh ‘măng năm tơmang ‘măng mă au tơbăt hơdăh tơdrong tơgoăt tơgoăl gĭt kăl ƀar Đảng, ƀar Tĕh đak. Kơdră chĕp pơgơ̆r Kuô̆k  hô̆i athei Lào hơnơ̆ng lăng ba, pơjing rơvơn hlŏh dơ̆ng ăn rim tơdrong vă jang kơ rim hơnĭh mơdro sa Việt Nam tŏk bŏk bơ̆ jang tơ̆ Lào lơ̆m hơmet pơ ‘lơ̆ng hơgăt tĕh vă tơ iung pơjing tơdrong jang, vă atŏk tơ iung mŭk drăm kơ ƀar Hơnĭh tơm. Jơnŭm vei lăng kon pơlei ƀar hơnĭh tơm gô vang chă pơma dơnŭh dĭh băl dôm trong jang hơ iă, tơgŭm pơjing keh đang rim hơnih bơ̆ jang pơjing khôi luơ̆t kơ Viêng Chăn bơ̆ jang jơnei păng hơmet pơ ‘lơ̆ng trong jang chĭnh trĭ, tơdrong jang pơjing khôi luơ̆t kơ Lào pơma atŭm.

Tơblơ̆ nơ̆r: Amazưt