Iung pơma tơ̆ jơ bơ̆ jang, Kơdră chĕp pơgơ̆r Kuô̆k hô̆i athei pơm hơdăh rim tơdrong nhen: trong jang tơplih đơ̆ng "lăng hơlen kiơ̆ hô sơ” jing “lăng hơlen trong jang", iung jang kơtang hrôih tơmơ̆t lơ̆m trong bơ̆jang. Kơdră chĕp pơgơ̆r Kuô̆k hô̆i pơma hơdăh, Kuô̆k hô̆i hlôi drơ̆ng mĭnh nơ̆r hăm Khul kơdră teh đak găh pơjing khôi luơ̆t kăl tơmơ̆t hloi tơdrong tơchơ̆t, trong pơtho tơbăt ‘lơ̆ng. Găh dăr lăng tơdrong jang kiơ̆ khôi luơ̆t, kiơ̆ đơ̆ng Kơdră chĕp pơgơ̆r Kuô̆k hô̆i, kăl pơm hơdăh păng tơlĕch trong jang hơdăh dăr lăng jăl jang ou lơ̆m rim tơdrong jang hơnih mong jên, chư̆ng khoan, ƀao hiêm, tơmơ̆t jên jang, rim tơdrong vă jang kăl păng mŭk drăm ŭnh hnam. Găh trong tơlĕch ăn tŏk lơ păng trong tŏk ‘nao, Hơnih bơ̆ jang vei lăng Mŭk drăm păng Jên hu kăl pơchoh trong ăn Kuô̆k hô̆i lơ̆m tơdrong vei lăng sơđơ̆ng, jang ‘lơ̆ng jên hu-kon jên bơ̆ jang teh đak, sơđơ̆ng teh đak hre, adoi pơjing đei trong jang ‘lơ̆ng ăn tŏk mŭk drăm, tơplih ‘nao tơchăr păng atok tơ iung khul pơm tơlĕch ‘nao.