Pơgê năr 7/9, tơ̆ Hàn Quốc, Kơdră chĕp pơgơ̆r Kuô̆k hô̆i Cho Jeong Sik pơm tơm pơm lêh sơng Kơdră chĕp pơgơr Kuô̆k hô̆i Trần Thanh Mẫn hăm Khul kơdră tang măt Việt Nam. Lăp đơ̆ng rŏng pơm lêh sơng, ƀar ‘nu kơdră chĕp pơgơ̆r Kuôk hô̆i pơgơ̆r pơma đam. Ƀar păh pơma dơnuh dih băl găh dôm tơdrong lơ̆m teh đak păng rim trong jang pơm hơtŏk tơgoăt tơgoăl dih băl. Ƀar păh drơ̆ng mĭnh nơ̆r vei kơjăp hơnơ̆ng ăn khul kơdră năm ngôi, tơƀơ̆p dih băl; tơlĕch trong lăng tơgoăt dih băl jang mŭk drăm lơ̆m khei ‘năr hle; hơdrin tĕch mơdro dih băl iŏk đei 100 ti USD lơ̆m sơnăm 2026 păng lăng truh 150 ti USD lơ̆m sơnăm 2030. Hàn Quốc hơnơ̆ng tơgŭm ăn ODA păng tơgŭm djru kăl ăn kơ Việt Nam; pơtrŭt kơtang jang hơdoi khoa hŏk, kmăi kmok păng pơjing rơvơn vă hơnih mơdro sa ƀar teh đak tơmơ̆t jên jang sơđơ̆ng, đunh đai. Ƀar păh jei drơ̆ng minh nơ̆r pơih să jang hơdoi pơtho pơjing khul bơ̆ jang, joh ayŏ, tơmang pơhiơ̆ păng kon pơlei năm ngôi dih băl; lăng ba vei lăng năng tông kon pơlei Việt hơrih sa tơ̆ Hàn Quốc păng bơngai Hàn Quốc tơ̆ Việt Nam, lơ̆m ou đei dang 100.000 ŭnh hnam Việt – Hàn.