Kơsơ̆ năr 1/4, tơ̆ Hnam Kuôk hô̆i, Kơdră chĕp pơgơ̆r Kuô̆k hô̆i Trần Thanh Mẫn pơm tơm ‘măng hop akŏm mă 56 kơ Hơnih jang Khul kơdră chĕp pơgơ̆r Kuô̆k hô̆i. Iung pơma tơ̆ jơ hop akŏm, Kơdră chĕp pơgơ̆r Kuôk hô̆i pơma hơdăh, mĭnh tơdrong tôch gĭt kăl ‘noh ăn tơgop nơ̆r hơmet ăn bơ̆ jang tơmơ̆t khul kơdră chĕp pơgơ̆r pơtruh ăn Kuô̆k hô̆i tơ̆ ‘Măng hop akŏm mă blŭng, Kuô̆k hô̆i jăl XVI; athei bơ̆ jang ou kăl đei hơmet ăn mă kơjăp, mă hơlen, sơđơ̆ng ƀlep trong tơlĕch ăn, tơdrong tơchơ̆t. Kơdră chĕp pơgơ̆r Kuô̆k hô̆i Trần Thanh Mẫn tơbăt, Hơnih bơ̆ jang Khul kơdră chĕp pơgơ̆r Kuô̆k hô̆i gô ăn tơgop nơ̆r găh lơ tơdrong kăl, lơ̆m ou đei trong vă pơjing Khôi luơ̆t hơmet ming, tơmơ̆t dơ̆ng mĭnh ƀar apăng kơ Khôi luơ̆t Bảo hiểm xã hội. Hơnih bơ̆ jang Khul kơdră chĕp pơgơ̆r Kuô̆k hô̆i ăn tơgop nơ̆r ‘măng mă hơtuch găh bơ̆ jang hơmet ăn ‘Măng hop akŏm mă blŭng, Kuô̆k hô̆i jăl XVI atŭm hăm dôm tơdrong pơm sơđơ̆ng bơ̆ jang kơ Kuô̆k hô̆i lơ̆m khei năr kơnh, đơ̆ng dôm hơnih jang tơmam drăm truh tơdrong tơgum djru đei ƀơm truh. ‘Măng hop akom jei gô ăn tơgop nơ̆r găh hla bơar chih tơbăt găh pơtôch tơdrong bơ̆ jang dăr lăng hơlen sơnăm 2025, dôm khei blŭng sơnăm 2026 păng trong vă bơ̆ jang dăr lăng sơnăm 2027 vă pơtruh ăn Kuôk hô̆i.