Tơ̆ ‘măng pơma dơnuh, Kơdră chĕp pơgơ̆r Kuôk hôi Trần Thanh Mẫn lui akhan atŭm hăm tơdrong iŏk jang kơchư̆k Tổng Thư ký Đảng Iung jang Kon pơlei, Thủ tướng Lawrence Wong gô chĕp pơgơ̆r Singapore iŏk đei lơ tơdrong jơnei tih tên hloh dơ̆ng lơ̆m atŏk tơ iung muk drăm-tơpôl, tơlĕch jang kiơ̆ jơnei rim tơdrong jang kăl, mă kăl ‘noh tơdrong jang "Singapore Atŏk tơ iung”. Đơ̆ng noh pơm hơtŏk hơnih dơ̆ng Singapore lơ̆m tơring păng lơ̆m apŭng plĕnh teh. Lăng dơ̆ng lơ̆m đơ̆ng rŏng hloh 50 sơnăm pơjing tơbôl păng 10 sơnăm pơjing tơgoăt tơgoăl Jang hơdoi gĭt kăl, ƀar ‘nu kơdră chĕp pơgơ̆r sơkơ̆t hơdăh tơgoăt tơgoăl Việt Nam - Singapore ling lang atŏk tơ iung, iŏk đei jơnei gĭt kăl lơ̆m rim tơdrong; lui yom dih băl chinh trĭ đei hơmet pơ ‘lơ̆ng ‘moi kiơ̆ vei kơjăp iŏk đei jơnei, hơnơ̆ng ăn khul kơdră năm ngôi, tơƀơ̆p pơma dơnuh dih băl; drơ̆ng nơ̆r lơ̆m khei năr kơnh, ƀar păh gô hơnơ̆ng iung jang hơdoi kơjăp, hrôih ba tơgoăt tơgoăl ƀar teh đak tŏk mĭnh hơyak pran kơtang ‘nao dơ̆ng.