Hloh 30 sơnăm pơjing tơbôl, mă kăl hăm tơdrong pơm hơtŏk jang hơdoi gĭt kăl tôm tong lơ̆m sơnăm 2022, tơdrong tơgoăt tơgoăl Việt Nam - Hàn Quốc tŏk bŏk lơ̆m jăl trong atŏk tơ iung ‘lơ̆ng hơ iă hloh đơ̆ng sơ̆ truh dang ei. Kiơ̆ đơ̆ng Kơdră chĕp pơgơ̆r Kuôk hô̆i Trần Thanh Mẫn, ‘noh jĭ tơdrong tơm vă rim hơnih mơdro sa ƀar teh đak sơđơ̆ng jơhngơ̆m jang hơdoi đunh đai, tih tên păng iŏk đei jơnei hloh dơ̆ng. Lơ sơnăm ou ki, Hàn Quốc ling lang vei kơjăp hơnih dơ̆ng mă blŭng găh tơmơ̆t jên jang kơtă tơ̆ Việt Nam, jang sa iŏk đei jô̆ truh khei 11 sơnăm ou ‘noh 90 ti USD. Kơdră chĕp pơgơ̆r Kuôk hô̆i Trần Thanh Mẫn ‘meh vă khei năr kơnh, Grŭp jang Samssung tơgŭm djru Việt Nam atŏk kơtang gơ̆h hơgei jang mơdro sa lơ̆m teh đak vă gơ̆h iung jang vang pơm tơlĕch ăn Grŭp jang; ‘meh vă Grŭp jang jing hơnih tơmơ̆t jên jang kăl hloh , tơgop tih tên hloh ăn tơdrong jang mŭk drăm Việt Nam, atŏk tơ iung kmăi kmŏk pơm tơlĕch tơmam drăm.