Kơdră chĕp pơgơ̆r Kuô̆k hô̆i hôn bơnê dôm tơdrong jang hơdoi roi năr roi hơmet pơ ‘lơ̆ng, kơjăp păng jơnei ƀar păh Kuô̆k hô̆i ƀar teh đak, mă kăl lơ̆m tơlĕch jang kiơ̆ Nơ̆r Tơchơ̆t atŭm Việt Nam - Lào, Drơ̆ng mĭnh nơ̆r ƀar păh Hơnih tơm Chinh trĭ, Tơdrong tơchơ̆t jang hơdoi ƀar păh ƀar Khul kơdră chĕp pơgơ̆r Teh đak păng tơdrong jang hơdoi ƀar păh Kuô̆k hô̆i, tơgop hơnhăk tơgoăt tơgoăl gĭt kăl Việt Nam - Lào roi năr roi kơtang, sơđơ̆ng păng kơjăp ‘lơ̆ng. Tơ̆ jơ tơƀơ̆p, ƀar păh drơ̆ng mĭnh nơr hơnơ̆ng pơtrŭt kơtang rim tơdrong jang gĭt kăl tih tên lơ̆m sơnăm 2025; iung jang kơtang hơmet ăn ‘măng năm tơmang Việt Nam đơ̆ng Tổng Bí thư, Kơdră chĕp pơgơ̆r teh đak Lào ƀlep lơ̆m năr tơbăt 80 sơnăm kĕch mang Khei Tơhngam păng Quốc khánh 2/9; atŏk kơtang rim tơdrong jang hơdoi nghĭ viê̆n ƀar pang păng lơ pang.