Lơ̆m ‘măng iung năm tơmang teh đak Cộng hòa Italia, năr 14/4, tơ̆ Hơnih tơm Roma, Kơdră chĕp pơgơ̆r Kuô̆k hô̆i Trần Thanh Mẫn  hăm Khul kơdră tang măt Việt Nam đei pơma dơnuh hăm kang ƀô̆, bơngai jang lơ̆m Hơnih tang măt Teh đak păng kon pơlei Việt Nam tơ̆ Italia. Kơdră chĕp pơgơ̆r Kuô̆k hô̆i hlôi tơroi tơbăt ăn kon pơlei Việt Nam tơ̆ Italia găh tơdrong lơ̆m teh đak hăm dôm jăl trong kăl nhen pơgơ̆r jơnei Hop akom kơ Đảng lơ̆m teh đak ‘măng mă 14, ‘măng pôk rơih kơdră tang măt Kuôk hô̆i jăl 16 păng kơdră tang măt Jơnŭm vei lăng kon pơlei rim kâp jăl jang 2026 – 2031. Kơdră chĕp pơgơ̆r Kuô̆k hô̆i akhan, kon pơlei bơngai Việt jĭ mĭnh khul tơgoăt tơgoăl kơjăp tơ̆ Italia, khei năr ou ki hlôi tơgoăt tơgoăl dih băl ‘lơ̆ng bơih, truh ou kơnh tơgoăt tơgoăl ‘lơ̆ng hơ iă hloh dơ̆ng, vă tơgum djru rim bơngai hok tro teh đak bơ̆n hok pơhrăm tơ̆ Italia vă đơ̆ng rŏng ou teh đak Việt Nam đei bơngai bơ̆ jang hơgei. Kơdră chĕp pơgơ̆r Kuô̆k hô̆i jei hơpơi ‘meh vă kon pơlei Việt Nam tơ̆ Italia vei kơjăp tơdrong oei sa joăt joe ‘lơ̆ng hơ iă kơ hơdrĕch hơdrung, nơ̆r pơma Việt tơ̆ teh đak ou; mă kăl pơm kiơ̆ ‘lơ̆ng khôi luơ̆t tơ̆ tơring hơrih sa.