Tổng Bí thư, Kơdră chĕp pơgơ̆r teh đak Tô Lâm sơkơ̆t hơdăh Việt Nam ‘meh vă ‘moi kiơ̆ ‘măng năm tơmang ou, hơnơ̆ng pơm kơtang hloh dơ̆ng lui yom dih băl chinh trĭ, pơjing đei trong ‘nao kơ jang hơdoi dih băl hăm tơgoăt tôm tong, lang să, atum dih băl tơlĕch jang kiơ̆ jơnei jang hơdoi lơ̆m khul Đảng, Teh đak, Khul kơdră chĕp pơgơ̆r Teh đak, Kuô̆k hô̆i - Nhân đại, Mặt trận - Chính hiệp, hơmet pơ ‘lơ̆ng tơdrong tơm jang hơdoi vei lăng sơđơ̆ng teh đak-sơđơ̆ng tơring. Kơdră chĕp pơgơ̆r Chính hiệp Vương Hộ Ninh sơkơ̆t hơdăh Trung Quốc ling lang lăng tơgoăt tơgoăl hăm Việt Nam jĭ trong tơlĕch jang kăl hloh lơ̆m tơdrong jang tơbôl teh đak tơjê̆; hôn bơnê kơ tang dôm tơdrong jơnei tơplih ‘nao kơ Việt Nam, ling lang tơgum djru Việt Nam tơ iung pơjing jơnei chủ nghĩa xã hội trŏ lăp hăm dôm tơdrong lơ̆m teh đak. Ƀok Vương Hộ Ninh athei ƀar păh băt hơdăh trong atok tơ iung tơgoăt tơgoăl dih băl, pơtrŭt kơtang jang kiơ̆ ‘lơ̆ng xã hội chủ nghĩa kơ teh đak kơ dih.