Iung pơma pơgơ̆r blŭng a hop akŏm mă 4 kơ Hơnih bơ̆ jang chĕp pơgơ̆r Kuô̆k hô̆i pơgê brei, năr 8/7, tơ̆ Hnam Kuô̆k hô̆i, Kơdră chĕp pơgơ̆r Kuô̆k hô̆i Trần Thanh Mẫn pơma hơdăh, tơdăh ưh sơđơ̆ng ăn ‘lơ̆ntg, keh đang ƀlep trong pơkăp kiơ̆ tơdrong jang lei Kơdră dơnơm, Kơdră chĕp pơgơ̆r hơnih bơ̆ jang chih tơlĕch păng hơnih bơ̆ jang dăr lăng chiu pŭ tơ̆ hơnăp Khul kơdră chĕp pơgơ̆r Teh đak, Thủ tướng Teh đak păng tơ̆ hơnăp Hơnih bơ̆ jang chĕp pơgơ̆r Kuô̆k hô̆i. Kơdră chĕp pơgơ̆r Kuô̆k hô̆i athei hăm dôm tơdrong oei đei nơ̆r tơgop phara dih băl, dăh mă trong jang hle hăm tơdrong tơchơ̆t đơ̆ng khôi luơ̆t, rim hơnih jang kăl iung jang hơdoi ‘lơ̆ng hăm rim hơnih bơ̆ jang kơ Kuô̆k hô̆i vă tơtom tơroi tơbăt ăn kơdră kơpal lăng hơlen, tơchơ̆t; ưh kơ lê̆ đunh truh jơ ‘năr tuch luch kơ rim ‘măng pơgơ̆r hop akŏm. Kơdră chĕp pơgơ̆r Kuô̆k hô̆i Trần Thanh Mẫn mĭnh ‘măng dơ̆ng pơma hơdăh, khôi luơ̆t kăl yak hơdoi păng hrơ̆p mĭnh ‘măng hăm tơdrong tơchơ̆t ‘noh rim trong bơ̆ jang đơ̆ng Kuô̆k hô̆i tơ̆ rim ‘măng hop akŏm mă đei trŏ lăp păng hrôih yak mơ̆t lơ̆m tơdrong hơrih. ‘Nou jei jing tơdrong mă kon pơlei păng hơnih mơdro sa gôchang hloh.