Tơdrong pơgơ̆r kơ yuơ Hơnih tơm Kŏng ang păng Trung ương Khul drŏ kăn Việt Nam vang pơgơ̆r lăng truh tơbăt 96 sơnăm Năr pơjing Khul drŏ kăn Việt Nam (20/10/1930 - 20/10/2026) păng Năr Drŏ kăn Việt Nam 20/10. Tơdrong pơgơ̆r Joh ayŏ kơdŏ soang “Tơgoăt ‘mêm mơnat dih băl” jĭ dôm tơdrong tơroi đei tơƀôh hơdăh hăm tơdrong joh hơsoang, um rup, ƀai chih păng tơdrong pơgơ̆r joh hơri, ‘moi kiơ̆ pêng jăl: “Jơhngơ̆m đon ‘mêm mơnat pơlei pơla” – “Tơgoăt ‘mêm mơnat dih băl” - “Jơva lơ̆m plei nuih”. ‘Moi kiơ̆ Tơdrong pơgơ̆r, Hơnih tơm Kŏng ang păng Trung ương Khul drŏ kăn Việt Nam ‘meh vă lang să tơdrong joăt joe “ ‘mêm mơnat dih băl”, pơm hơtŏk hơnăp jang păng tơdrong vang iung jang đơ̆ng kon pơlei pơla hăm dôm tơdrong jang hơdăh; tơgop lăng ba dôm tơdrong tơnap tap hăm đe drŏ kăn păng hơ ioh jĭ jăn, ŭnh hnam tơnap tap, adoi lang să um rup kơ bơngai kang ƀô̆, kŏng ang kơ Khul kŏng ang kon pơlei hơnăp jang, jơhngơ̆m đon ‘mêm mơnat, kơ yuơ kon pơlei pơvih pơvăn.