Tơ̆ Hơnih bơ̆ jang kơ Hơnih tơm jang tơbôl, Mơdro sa păng Lui khop Argentina tơ̆ Hơnih tơm Buenos Aires, lơ̆m ‘măng iung năm tơmang teh đak Argentina, Kơdră chĕp pơgơ̆r Kuô̆k hô̆i Vương Đình Huệ hlôi vang năm Hop akŏm Hơnih mơdro sa Việt Nam - Argentina.

Iung pơma tơ̆ Hop akŏm, yă Cecilia Todesca Bocco, Kơdră chĕp pơgơ̆r rim tơdrong jang mŭk drăm, apŭng plĕnh teh kơ Hơnih tơm jang tơbôl, Mơdro sa păng Lui khop Argentina tơbăt, tơdrong tĕch mơdro dih băl păng tơgum djru dih băl kơ ƀar teh đak hlôi tơgop tih tên ăn atŏk kơtang tơgoăt tơgoăl jang hơdoi găh mŭk drăm, mơdro sa ƀar teh đak lơ̆m khei năr au ki. Việt Nam ‘noh teh đak jang hơdoi mơdro sa dơ̆ng mă 6 kơ Argentina hăm tĕch tơlĕch iŏk đei 3 ti 200 triu USD păng răt tơmơ̆t đơ̆ng Việt Nam 1 ti 240 triu dolar. Yă Cecilia Todesca Bocco tơbăt, hop akŏm jei vă xơkơ̆t hơdăh trong bơ̆ jang hăm dôm tơdrong vă jang gơ̆h jang hơdoi; adoi pơma hơdăh, hop akom jei jing hơnih vă ƀar păh lăng truh jang hơdoi 50 sơnăm kơnh.