VOV4.Bahnar - Drung kơsơ̆ năr 11/8, tơ̆ Hnam Kuô̆k hô̆i, Kơdră chĕp pơgơ̆r Kuô̆k hô̆i Vương Đình Huệ vang năm pơgơ̆r Pơma dơnŭh tơgop nơ̆r trong vă pơjing dôm tơdrong ăn ‘măng hop akŏm Kuô̆k hô̆i (hơmet ming) kơ yuơ Dơnŏ anĭh tơm Tơchĕng hơlen khôi luơ̆t păng Hơnĭh bơ̆ jang Kuô̆k hô̆i pơgơ̆r.

Kơdră chĕp pơgơ̆r Kuô̆k hô̆i Vương Đình Huệ vang năm păng iung pơma tơ̆ jơ pơgơ̆r Pơma dơnŭh

Iung pơma tơ̆ jơ pơma dơnŭh, Kơdră chĕp pơgơ̆r Kuô̆k hô̆i Vương Đình Huệ sơkơ̆t hơdăh, ‘măng hop akŏm ‘nŏh jing tơdrong pơgơ̆r kăl hlŏh kơ Kuô̆k hô̆i. Khei năr au ki, hlôi đei lơ tơdrong lơ̆m dôm tơdrong ‘măng hop akŏm đei apĭnh athei tơgop nơ̆r đơ̆ng Kuô̆k hô̆i ăn jang pơlong năng vă oei sa hơdoi ‘lơ̆ng hơ iă lơ̆m khei ‘năr đei jĭ hơbŭh Covid-19 păng tơdrong yan au. Hơnơ̆ng lơ̆m ming hơmet au, rim hơnĭh bơ̆ jang kơ Kuô̆k hô̆i hlôi hơdrin, tĕnh koăng chă tơchĕng hơlen tơ iung pơjing Trong vă jang, pơgơ̆r lơ ‘măng Hop akŏm, pơma dơnŭh, pơtrŭh nơ̆r tơgop lơ hơnĭh bơ̆ jang, pơgơ̆r vă pơm pơkeh trong jang ‘măng Hop akŏm Kuô̆k hô̆i (hơmet ming). Trong vă pơjing hlôi đei Dơnŏ anĭh bơ̆ jang Khôi luơ̆t hơlen păng pơtrŭh ăn Dơnŏ anĭh chĕp pơgơ̆r Kuô̆k hô̆i ăn tơgop nơ̆r ‘măng mă blŭng tơ ‘măng hop akŏm mă 11 lơ̆m khei 5/2022.

Tơblơ̆ nơ̆r: Amazưt