VOV4. Bahnar - Ƀlep lơ̆m ƀok Álvaro Elizarde đei pôk tơmơ̆t jang Kơdră chĕp pơgơ̆r Thượng viện păng ƀok Raul Soto Mardones đei pôk tơmơ̆t jang Kơdră chĕp pơgơ̆r Hạ viện tĕh đak Cộng hòa Chile, tang măt ăn Kuô̆k hô̆i Cộng hòa xã hội chủ nghĩa Việt Nam, Kơdră chep pơgơ̆r Kuô̆k hô̆i Vương Đình Huệ hlôi pơtrŭh kơthơ hmach chơt hơ iă. Lơ̆m kơthơ pơtrŭh ăn kơ ƀok Álvaro Elizarde, Kơdră chĕp pơgơ̆r Thượng viện Cộng hòa Chile păng ƀok Raul Soto Mardones, Kơdră chĕp pơgơ̆r Hạ viện Cộng hòa Chile, Kơdră chĕp pơgơ̆r Kuôk hô̆i Vương Đình Huệ pơma tơbăt jơhngơ̆m đon chơt hơ iă lăng ƀôh tơdrong Tơgoăt tơgoăl jang hơdoi tôm tong ƀar păh Việt Nam păng Chile roi năr roi atŏk tơ iung ‘lơ̆ng; ƀar tĕh đak ‘nao tơbăt 50 sơnăm năr pơjing tơbôl. Lơ̆m khei năr kơnh, Kơdră chĕp pơgơ̆r Kuôk hô̆i Vương Đình Huệ ‘mĕh vă, iung jang hơdoi kơ jăp hăm nghị viện Chile vă pơtrŭt kơtang hlŏh dơ̆ng tơgoăt tơgoăl kơ ƀar tĕh đak, Kuô̆k hô̆i păng kon pơlei Việt Nam - Chile roi năr roi kơtang, tơpă, jơnei, kơ yuơ đei iŏk yua tơpă ăn kon pơlei ƀar tĕh đak, kơ yuơ rơngei hiôk hian, sơđơ̆ng, jang hơdoi, atŏk tơ iung lơ̆m tơring păng tơ̆ apŭng plĕnh tĕh.

Tơblơ̆ nơ̆r: Amazưt