VOV4. Bahnar - Lơ̆m ‘măng iung năm tơmang tĕh đak Cộng hoà Dân chủ Nhân dân Lào, pơgê năr 16/5, tơ̆ Hơnĭh tơm Viêng-chăn, Kơdră chĕp pơgơ̆r Kuô̆k hô̆i Vương Đình Huệ hlôi năm kŭh ka hla bat pơma dơnŭh hăm ƀok Thongloun Sisoulith, Tổng Bí thư Ban Chấp hành Trung ương Đảng Kon pơlei kĕch mang Lào, Kơdră chĕp pơgơ̆r Tĕh đak Cộng hoà Dân chủ Nhân dân Lào.

Kơdră chĕp pơgơ̆r Kuô̆k hô̆i Vương Đình Huệ lui kiơ̆ kơ jăp kon pơlei Lào ‘nhŏng ŏh gô yak hlŏh rim tơdrong long, jang keh kong Tơdrong tơchơ̆t Pơm lêh Hop akŏm Đảng lơm tĕh đak ‘măng mă XI păng Trong pơ prŏ vă jang atŏk tơ iung mŭk drăm-tơpôl 5 sơnăm ‘măng mă IX, tơlĕch jang kiơ̆ jơnei rim trong jang plôih ‘măng, hơmet pơ ‘lơ̆ng mŭk drăm, sơđơ̆ng mŭk drăm - jên hu, pơjing tơdrong jang, hơnơ̆ng tơ iung pơjing tĕh đak Lào rơngei hiôk hian, pơm tơm kơ dĭh, pơdrŏng kiơ̆ trong jang xã hội chủ nghĩa. Ƀar ‘nu kơdră chĕp pơgơ̆r pơma hơdăh, lơ̆m khei năr kơnh, ƀar păh kăl atŏk kơtang pơrô̆ jang hơdoi tơklep kơ jăp, lui kiơ̆ dĭh băl kơtang; vang atŏk tơ iung tơpăt rim tơdrong drơ̆ng minh nơ̆r kơdră kơpal; hơdrin atŏk kơtang jang jơnei tơdrong jang hơdoi lơ̆m rim tơdrong, kơ yuơ tơdrong đei iok yua kơ jăp ăn kon pơlei ƀar tĕh đak.

Tơblơ̆ nơ̆r: Amazưt