VOV4.Bahnar - Kơ yuơ Kơdră chĕp pơgơ̆r Kuô̆k hô̆i Vương Đình Huệ, pơgê năr 7/9, Hop akŏm kơdră tang măt Kuô̆k hô̆i hlôi pơgơ̆r blŭng a vă pơma dơnŭh, ăn tơgop nơ̆r lơ̆m 6 tơdrong vă pơjing khôi luơ̆t, 1 tơdrong tơchơ̆t pơtrŭh ăn Kuô̆k hô̆i pơdrơ̆ng kiơ̆ lơ̆m ‘Măng hop akŏm mă 4 kơnh.

Iung pơma tơ̆ pơgơ̆r blŭng a, Kơdră chĕp pơgơ̆r Kuô̆k hô̆i Vương Đình Huệ tơbăt, đơ̆ng blŭng jăl jang trŭh dang ei, Kuôk hô̆i jăl XV hlôi pơgơ̆r keh đang 4 ‘măng hop akŏm, pơjing đei 8 khôi luơ̆t, ăn tơgop nơ̆r 7 tơdrong vă pơjing khôi luơ̆t anai, pơjing đei 62 tơdrong tơchơ̆t hăm drơ̆ng mĭnh nơ̆r kơtang.

‘Măng hop akŏm mă 4 jê̆ trŭh au kơnh kơ Kuô̆k hô̆i đei lơ tơdrong jang pơjing khôi luơ̆t gĭt kăl. Rim tơdrong vă pơjing pơtrŭh ăn Kuô̆k hô̆i pơdrơ̆ng nơ̆r hlôi đei Dơnŏ anĭh chĕp pơgơ̆r Kuô̆k hô̆i, Khŭl kơdră tĕh đak pơrô̆ pơgơ̆r pơma dơnŭh, iŏk nơ̆r tơgop lơ ‘măng, tơ̆ lơ hop akŏm, pơma dơnŭh, Dơnŏ anĭh chĕp pơgơ̆r Kuô̆k hô̆i jei hlôi ăn tơgop nơ̆r tôch brĕ găh dôm tơdrong tĭh oei đei nơ̆r tơgop phara dĭh băl tơ̆ ‘Măng hop akŏm kơdră găh tơ iung pơjing khôi luơ̆t blŭng a kơ Dơnŏ anĭh chĕp pơgơ̆r Kuô̆k hô̆i.

Tơblơ̆ nơ̆r: Amazưt