VOV4.Bahnar - Pơgê năr 10/10 tơ̆ Hnam Kuô̆k hô̆i kơ yuơ Kơdră chĕp pơgơ̆r Kuô̆k hô̆i Vương Đình Huệpơm tơm, ‘măng hop akŏm mă 16 kơ Dơnŏ anĭh chĕp pơgơ̆r Kuô̆k hô̆i hlôi đei pơgơ̆r. Pơgơ̆r lơ̆m 3 năr, tơ̆ hop akŏm, Dơnŏ anĭh chĕp pơgơ̆r Kuô̆k hô̆i tơgop nơ̆r găh dôm tơdrong kăl vă pơtrŭh ăn Kuô̆k hô̆i tơ̆ ‘Măng hop akŏm mă 4, Kuôk hô̆i jăl XV gô đei pơgơ̆r lơ̆m năr 20/10 kơnh.

Pơgơ̆r blŭng a Hop akŏm, Kơdră chĕp pơgơ̆r Kuôk hô̆i Vương Đình Huệ hlôi pơma hơdăh dôm tơdrong kăl kơ hop akŏm au, Dơnŏ anĭh chĕp pơgơ̆r Kuô̆k hŏi gô tơgop nơ̆r găh hla bơar chĭh tơbăt bơ̆ jang đơ̆ng Khŭl kơdră tĕh đak găh mŭk drăm-tơpôl păng kon jên bơ̆ jang tĕh đak. Tơ̆ hơnăp đei tơdrong tơnap tap kơ tơdrong jang mŭk drăm apŭng plĕnh teh, găh lơ̆m tĕh đak, ‘ngoăih dôm tơdrong rơvơn, jei đei lơ tơdrong ư̆h kơ ‘lơ̆ng, tơnap tap păng long, kơ yuơ lơ loh, kăl hơlen mă ƀlep tơdrong kiơ pơm ăn, hơlen hơdăh dôm trong jang iŏk đei, mă kăl trong vă iung jang lơ̆m sơnăm 2023, pơkă athei Dơnŏ anĭh chĕp pơgơ̆r Kuô̆k hô̆i tơlĕch jang kiơ̆ kơtang Hop akŏm Trung ương 6, hơlen kiơ̆ tơdrong đei ƀô̆h hơdăh trong hơmet ming kon jên khei, jên pơdơ̆h jang, tơgŭm djru ƀao hiêm tơpôl păng tơgum djru ăn dôm bơngai đei iŏk yua ăn tĕh đak sơnăm 2023 vă hơlen, tơchơ̆t ăn.

VOV/Amazưt tơblơ̆ nơ̆r