VOV4. Bahnar - Sơng iŏk nơ̆r krao hơvơn đơ̆ng Kơdră chep pơgơ̆r Kuô̆k hô̆i Vương Đình Huệ, Kơdră chĕp pơgơ̆r Kuô̆k hô̆i tĕh đak Cộng hoà Mozambique pơm tơm Khŭl Kơdră tang măt Kuô̆k hô̆i Cộng hoà Mozambique iung năm tơmang tĕh đak Cộng hoà xã hội chủ nghĩa Việt Nam đơ̆ng năr 18-23/6. Pơm lêh sơng Kơdră chĕp pơgơ̆r Kuô̆k hô̆i Cộng hoà Mozambique đei pơgơ̆r tơ̆ Hnam Kuô̆k hô̆i lơ̆m pơgê năr 20/6 kơ yuơ Kơdră chĕp pơgơ̆r Kuô̆k hô̆i Vương Đình Huệ pơm tơm.

Lăp đơ̆ng rŏng pơm lêh sơng hlôi đei pơgơ̆r pơma dơnŭh dĭh băl ƀar păh Khŭl kơdră tang măt Kuô̆k hô̆i ƀar tĕh đak. Tơ̆ pơma dơnŭh, Kơdră chĕp pơgơ̆r Kuô̆k hô̆i sơkơ̆t hơdăh, Việt Nam lăng kơ jăp tơgoăt tơgoăl jang hơdoi joăt joe hăm Mozambique; jĭ tĕh đak kăl iung jang hơdrol vă pơtrŭt kơtang tơgoăt jang hơdoi chĭnh trĭ-tơbôl păng jang hơdoi mŭk drăm tơ̆ châu Phi lơ̆m khei ‘năr hrei au. Ƀar ‘nu kơdră chĕp pơgơ̆r Kuô̆k hô̆i lui akhan, Hla bơar pơkăp ƀlŏk hơdơ̆r găh jang hơdoi ƀar Kuô̆k hô̆i Việt Nam hăm Kuô̆k hô̆i Mozambique đei kĭ pơkăp tơ̆ ‘măng iung năm tơmang au gô tơgoăt ƀar Kuô̆k hô̆i tơ jê̆ dĭh băl hlŏh dơ̆ng, đei jing tơgoăt tơgoăl ‘lơ̆ng hơ iă hlŏh ƀar păh Kuô̆k hô̆i ƀar tĕh đak; ‘nau jing trong jang tơm vă Kuô̆k hô̆i ư̆h pơdơ̆h hơmet pơ ‘lơ̆ng păng atŏk kơtang tơgoăt tơgoăl jang hơdoi lơ̆m khei năr kơnh.

Tơblơ̆ nơr: Amazưt