Tơ̆ ‘măng pơma dơnuh, Ƀả ‘nu kơdră hơlen tơdrong tơgoăt tơgoăl Jang hơdoi Tôm tong Việt Nam – Argentina khei năr au ki hơnơ̆ng atŏk tơ iung kơtang păng jơnei, ‘moi kiơ̆ ăn khul năm ngôi dih băl păng khul kơdră kơpal tơƀơ̆p dih băl; rim trong jang hơdoi nhen Hơnih bơ̆ jang Khul kơdră chĕp pơgơ̆r ƀar teh đak păng Pơma dơnuh dih băl chinh trĭ ƀar păh Hơnih tơm jang tơbôl đei tơlĕch jang hơnơ̆ng ‘lơ̆ng hơ iă, truh hloi lơ̆m khei năr đei jĭ hơbuh Covid-19.

Ƀar ‘nu kơdră chĕp pơgơ̆r drơ̆ng mĭnh nơ̆r pơm kơtang hloh dơ̆ng tơgoăt tơgoăl chinh trĭ-tơbôl, kon pơlei năm ngôi dih băl, adoi pơgĕnh dôm tơdrong đei rim tơmam drăm gơ̆h chă tơgŭm dih băl vă hơdrin hơnhăk tơdrong tĕch mơdro dih băl ñar păh iŏk đei 10 ti dolar lơ̆m sơnăm 2025.  Kơdră chĕp pơgơ̆r Kuô̆k hô̆i Vương Đình Huệ pơma hơidăh, atŏk kơtang jang hơdoi ƀar păh Kuô̆k hô̆i ƀar teh đak tơgop gĭt kăl pơtrŭt kơtang tơgoăt tơgoăl dih băl pơma atŭm adoi nhen pơjing păng tơlĕch jang kiơ̆ khôi luơ̆t ‘lơ̆ng hơ iă ƀar păh teh đak pơma hơdrô̆.