VOV4.Bahnar - Kơsơ̆ năr 13/7, tơ̆ Hnam Kuô̆k hô̆i, Kơdră chĕp pơgơ̆r Kuô̆k hô̆i Vương Đình Huệ sơng pơma dơnŭh hăm Kơ iĕng Kơdră chĕp pơgơ̆r Kuô̆k hô̆i Lào Sommad Pholsena pơm tơm Khŭl tang măt kơdră kơpal Kuô̆k hô̆i Lào tŏk bŏk năm tơmang păng bơ̆ jang tơ̆ Việt Nam.

Kơdră chĕp pơgơ̆r Kuô̆k hô̆i Vương Đình Huệ akhan, ‘măng năm tơmang đơ̆ng Kơ iĕng Kơdră chĕp pơgơ̆r Kuô̆k hô̆i Lào tơ̆ Việt Nam ‘măng mă au vă pơm pơ ‘lơ̆ng hlŏh dơ̆ng drơ̆ng mĭnh nơ̆r jang hơdoi ƀar păh Kuô̆k hô̆i ‘nao đei ƀar ‘nu Kơdră chĕp pơgơ̆r Kuô̆k hô̆i ƀar tĕh đak kĭ pơkăp tơ̆ Lào. ‘Nau jei jing jơ ‘năr vă ƀar păh pơma dơnŭh, tơbăt dĭh băl trong bơ̆ jang hơ iă kơ Kuô̆k hô̆i tĕh đak kơ dĭh. Kơdră chĕp pơgơ̆r Kuô̆k hô̆i Vương Đình Huệ sơkơ̆t hơdăh, Việt Nam păng Kuô̆k hô̆i Việt Nam ling lang lăng atŏk kơtang atŏk tơ iung tơgoăt tơgoăl gĭt kăl hăm Lào ‘nŏh jing mĭnh trong jang kăl hlŏh. Kơdră chĕp pơgơ̆r Kuô̆k hô̆i lui akhan, hăm tơdrong pơrô̆ đơ̆ng Đảng, trong chĕp pơgơ̆r đơ̆ng tĕh đak, tơdrong vang tơgŭm djru đơ̆ng kon pơlei lơ̆m tĕh đak păng bôl boăl apung plĕnh tĕh, ư̆h kơ jor Lào gô yak hlŏh tơnap tap, atŏk tơ iung pran kơtang hlŏh dơ̆ng.

Tơblơ̆ nơ̆r: Amazưt