Tơ̆ jơ sơng pơma dơnŭh, Kơdră chĕp pơgơ̆r Kuô̆k hô̆i akhan, khei năr tơgoăt tơgoăl păng tơdrong hlôh vao găh Việt Nam ‘nŏh jing tơdrong kăl hlŏh vă Kơdră tang măt tĕh đak jang keh đang tơdrong jang kơdĭh, tơgop kơtang lơ̆m pơtrŭt tơgoăt tơgoăl Jang hơdoi gĭt kăl Việt Nam-Phalăng păng tơgoăt tơgoăl, jang hơdoi ‘lơ̆ng liĕm ƀar păh Kuô̆k hô̆i Việt Nam hăm Nghị viện Phalăng.

Kơdră tang măt Nicolas Warnery akhan, lơ̆m 2 sơnăm au ki, mă đơ̆ng đei ƀơm răm đơ̆ng jĭ hơbŭh Covid-19 mă lei hlŏh đơ̆ng chă pơma dơnuh dĭh băl trư̆k tuyên, Kuô̆k hô̆i Việt Nam păng Nghị viện Phalăng, Khŭl Nghị sĩ tơgoăt tơgoăl ƀar tĕh đak oei hơnơ̆ng vei kơ jăp ‘lơ̆ng rim tơdrong jang chă pơma dơnŭh, jang hơdoi. Kơdră chĕp pơgơ̆r Kuô̆k hô̆i pơma hơdăh, Việt Nam ling lang lăng kơjăp tơgoăt tơgoăl jang hơdoi tôm tong hăm Jơnŭm atŭm châu Âu (EU) păng hăm Phalăng adoi nhen rim tĕh đak lơ̆m EU; ‘mĕh vă hơnơ̆ng sơng iŏk đei tơdrong tơgum djru đơ̆ng Phalăng lơ̆m hơnơ̆ng pơtrŭt kơtang hlŏh dơ̆ng, jơnei hlŏh dơ̆ng tơgoăt tơgoăl jang hơdoi Việt Nam - EU.