VOV4.Bahnar - Hơnơ̆ng bơ̆ jang lơ̆m ‘măng năm tơmang tĕh đak Anh, kơsơ̆ năr 29/6, tơ̆ Hơnĭh tơm London, Kơdră chĕp pơgơ̆r Kuôk hô̆i Vương Đình Huệ hlôi tơ ƀơ̆p Kơdră chĕp pơgơ̆r Pơlei tơm London Peter Estlin. Tơ̆ jơ tơƀơ̆p, Kơdră chĕp pơgơ̆r Kuô̆k hô̆i Vương Đình Huệ pơma hơdăh, hơnăp jang kơ Pơlei tơm London ‘nŏh mĭnh lơ̆m 4 pơlei tơm jang mŭk drăm tĭh hlŏh lơ̆m apŭng plĕnh tĕh, lơ hơnĭh jang mong jên Anh nhen Prudential, HSBC, Standard Chartered… hlôi bơ̆ jang jơnei tơ̆ Việt Nam lơ̆m dôm sơnăm au ki. Kơdră chĕp pơgơ̆r Kuô̆k hô̆i athei păh boăl tơgŭm djru Việt Nam pơm pơkeh trong bơ̆ jang khôi luơ̆t lơ̆m bơ̆ jang jên hu, hơnĭh mong jên, kmăi kmok châm điêm rim Kŏng ty păng Hơnĭh mơdro sa. Ƀar păh tơbăt jơhngơ̆m đon hơmŏ, lơ̆m khei năr kơnh, rim tơdrong tơgoăt tơgoăl jang hơdoi dĭh băl, pơjing trong jang, khôi luơ̆t, hơlen hơdăh jang ăn tŏk iŏk hên, atŏk kơtang jang ‘lơ̆ng kơ rim hơnĭh mơdro sa, pơtrŭt kơtang tơgoăt tơgoăl mơdro sa dĭh băl Anh păng Việt Nam atŏk tơ iung ‘lơ̆ng liĕm.

Tơblơ̆ nơ̆r: Amazưt