Hơnơ̆ng iung năm tơmang Australia, kơsơ̆ năr 2/12 (kiơ̆ jơ tơring), tơ̆ hnam trương Đăi hŏk RMIT, pơlei tơm Melbourne, ƀang Victoria, Kơdră chĕp pơgơ̆r Kuô̆k hô̆i Vương Đình Huệ vang năm Hop akŏm jang hơdoi mŭk drăm Việt Nam-Australia. 

Iung pơma tơ̆ hop akŏm, Kơdră chĕp pơgơ̆r Kuô̆k hô̆i Vương Đình Huệ pơma hơdăh, tơgoăt tơgoăl chĭnh trĭ yom kiơ̆ kơtang păng ‘lơ̆ng hơ iă ƀar păh tĕh đak jing hơyak ăn tơdrong atŏk tơ iung găh jang hơdoi tôm tong lơ̆m rim tơdrong jang kơ Việt Nam păng Australia. Tơdăh tơdrong tơgoăt tơgoăl ‘lơ̆ng liĕm, lui kiơ̆ dĭh băl kơ jăp chĭnh trĭ, tơbôl ‘nŏh hơyak tơm lei tơdrong yak năm ngôi dĭh băl kơ kon pơlei jing tơdrong tơklep dĭh băl kơtang hlŏh. Tơdrong yak năm ngôi dĭh băl kơ kon pơlei hlôi đei tơgop đơ̆ng tơmoi tơmang pơ hiơ̆ kơ ƀar tĕh đak. Lơ̆m au, kon pơlei Việt Nam tơ̆ Australia đei dang 350.000 ‘nu, jing kon pơlei lơ mă 5 kơ tĕh đak đe oei tơ̆ Australia. Kơdră chĕp pơgơ̆r Kuô̆k hô̆i Vương Đình Huệ akhan, ‘nau jing dôm bơngai kơdranh kơ tơdrong tơgoăt tơgoăl kơ jăp kơ ƀar tĕh đak, ‘nŏh tơdrong pơvei jang mŭk drăm mơdro sa păng tơmơ̆t jên jang ‘nŏh hơyak pran gĭt kăl hlŏh ăn tơgoăt tơgoăl Jang hơdoi tôm tong kơ ƀar tĕh đak.