Iung pơma tơ̆ jơ tơƀơ̆p, Kơdră chep pơgơ̆r teh đak Nguyễn Xuân Phúc pơma hơdăh, lơ̆m mĭnh sơnăm mĭnh poăt pơjing Tơdrong vă jang, Dơnŏ anĭh chĕp pơgơ̆r păng Khŭl chĭh hơlen tơ iung pơjing Tơdrong vă jang hlôi hơdrin păng keh đang tơdrong jang tih tên.

Mă kăl ‘nŏh hlôi hơvơn rim hơnĭh bơ̆ jang Trung ương pơjing đei 27 tơdrong tơm hơlen pơtôch; pơgơ̆r pêng ‘măng hop akom teh đak, 15 ‘măng hop akŏm tih, pơma dơnuh păng pêng ‘măng Hop akŏm iŏk nơ̆r tơgop đơ̆ng rim dơnŏ anĭh Đảng dêh char, pơlei tơm; chă hơvơn vang iung jang đơ̆ng rim bơngai joăt jang, bơngai khoa hŏk, kang ƀô̆ bơ̆ jang, rim hơnih tơm chă tơchĕng hơlen, hnam trương đăi hŏk lơ̆m teh đak. Kơdră chep pơgơ̆r teh đak sơkơ̆t hơdăh, Tơdrong tơchơt găh “Hơnơ̆ng tơ iung pơjing păng pơm pơkeh Teh đak pháp quyền xã hội chủ nghĩa Việt Nam lơ̆m chăl ‘nao” ‘nŏh tơmam drăm jơhngơ̆m đon hơgei đơ̆ng tơpôl păng tơdrong vang tơgop đĭ jơhngơ̆m đơ̆ng rim bơngai joăt jang lơ̆m Khul chih hơmet. Kơdră chĕp pơgơ̆r Teh đak athei atŏk kơtang pơrô̆ pơrôp, đei trong iung jang kơtang lăp đơ̆ng rŏng tơlĕch jang kiơ̆ Tơdrong tơchơ̆t đei jang kiơ̆ tơ̆ hop akŏm lơ̆m teh đak chă tơchĕng, hŏk pơhrăm, tơlĕch jang kiơ̆ rim tơdrong tơchơ̆t Hop akom mă 6 jăl XIII.