Iung pơma tơ̆ jơ bơ̆jang, Kơdră chĕp pơgơ̆r teh đak Lương Cường athei dêh char, lơ̆m khei năr kơnh, kăl hơnơ̆ng tơlĕch jang kiơ̆ kơtang, pơchoh trong hơdrin truh sơnăm 2030 ba Thanh Hoá jing “Dêh char Pơdrŏng ‘lơ̆ng liĕm, gơ̆h hơgei oei sa ‘lơ̆ng; mĭnh lơ̆m hơnih tơm tih hloh tơring Bắc Trung Ƀộ păng lơ̆m teh đak găh kmăi kmŏk ŭnh hơyuh păng pơm tơlĕch; choh jang sa đei iŏk yua kơjăp; tơdrong jang logistics, tơmang pơhiơ̆, pơtho pơhrăm, jang pơgang gơ̆h hơgei; mĭnh pang atŏk tơ iung kơtang ‘nao atŭm hăm  Hà Nội, Hải Phòng păng Quảng Ninh pơjing đei puăn pang atŏk tơ iung păh Tu kơ Teh đak”, truh sơnăm 2045 ‘noh “dêh char atŏk tơ iung tôm tong păng ‘lơ̆ng rŏ hloh lơ̆m teh đak". ‘Moi kiơ̆ tơdrong ou, Kơdră chĕp pơgơ̆r Teh đak athei dêh char kăl hơnơ̆ng vei lăng năng tông tơ iung pơjing Đảng ƀô̆, Khul kơdră chĕp pơgơ̆r păng khul chinh trĭ rơgoh ‘lơ̆ng, pran kơtang, kơtoei, jang hơgei, jơnei hơ iă.