Tơ̆ jơ tơƀơ̆p, Kơdră chĕp pơgơ̆r teh đak sơkơ̆t hơdăh Việt Nam ling lang lăng kơjăp păng hơpơi ‘meh vă atŏk kơtang jang hơdoi hăm Hungary, teh đak jang hơdoi kăl hloh, adoi jing Teh đak jang hơdoi tôm tong blŭng a kơ Việt Nam tơ̆ Trung Đông Âu. Hôn bơnê kơtang tơdrong iŏk đei jơnei ‘măng pơma đam ƀar păh Kơdră chĕp pơgơ̆r Kuô̆k hô̆i Việt Nam Trần Thanh Mẫn hăm Kơdră chĕp pơgơ̆r Kuô̆k hô̆i Hungary, Kơdră chĕp pơgơ̆r teh đak Lương Cường ‘meh vă hơnih bơ̆ jang pơjing khôi luơ̆t ƀar teh đak hơnơ̆ng iung jang hơdoi vă pơjing đei tơdrong jang khôi luơ̆t trŏ lăp, pơjing rơvơn ăn rim tơdrong hơdrin pơtrŭt kơtang tơgoăt tơgoăl jang hơdoi ƀar teh đak, trŏ lăp hăm tơdrong đei iŏk yoa atŭm kơ ƀar teh đak, tơgop lơ̆m rơngei hiôk hian, sơđơ̆ng, jang hơdoi păng atŏk tơ iung tơ̆ tơring păng lơ̆m apŭng plĕnh teh. Găh jang hơdoi lơ pang, ƀar ‘nu kơdră sơkơ̆t hơdăh Việt Nam hăm Hungary gô hơ nơ̆ng iung jang hơdoi kơjăp păng tơgŭm djru dih băl tơ̆ rim ‘măng hop akom lơ pang, mă kăl tơ̆ Liên hợp quốc, lơ̆m khul ASEAN-EU; adoi sơkơ̆t hơdăh tơdrong tơgŭm djru trong jang xek tơlang rim tơdrong tơgar dih băl hăm trong rơngei hiôk hian, ‘moi kiơ̆ trong yom kiơ̆ khôi luơ̆t apŭng plĕnh teh, vei kơjăp sơđơ̆ng dơ̆ng kơ jăp tơ̆ rim tơring.