Sơng pơma dơnuh hăm Kơdră tang măt Campuchia, yă Touch Pharat, Kơdră chĕp pơgơ̆r Teh đak Lương Cường hmach chơt hơ iă ăn Kơdră tang măt teh đak iŏk bơ̆ jang tơ̆ Việt Nam, lui hăm tơdrong bơ̆ jang gơh hơgei lơ̆m jang tơbôl, Kơdră tang măt gô đei lơ tơgop ‘lơ̆ng hơ iă, tơgop pơm hơtŏk tơgoăt tơgoăl teh đak tơjê̆ ‘lơ̆ng hơ iă, joet joe sơ̆ ki, jang hơdoi tôm tong, kơjăp ‘lơ̆ng đunh đai tai sơnăm kơ ƀar teh đak. Kơdră chĕp pơgơ̆r Teh đak sơkơ̆t hơdăh tơdrong kăl chĭnh trĭ, tơƀôh hơdăh trong bơ̆ jang trŏ lăp đơ̆ng Việt Nam ling lang lăng kơjăp ăn tơdrong atŏk tơ iung tơgoăt tơgoăl ‘lơ̆ng hơ iă joăt joe đơ̆ng sơ̆ Việt Nam - Campuchia adoi nhen ƀar păh pêng teh đak Việt Nam - Campuchia – Lào ling lang tơgoăt tơgoăl pôm nơ̆r ƀơ̆r đon gô kĕ yak hloh dôm tơdrong tơnap tap.

Hmach chơt hơ iă ăn kơ ƀok Thammer Mohammed Al Gosaibi đei pôk tơmơ̆t pơm Bơngai tang măt kăl kơ teh đak Saudi Arabia tơ̆ Việt Nam; Kơdră chĕp pơgơ̆r Teh đak Việt Nam hôn bơnê kơtang hơnăp jang păng hơnih dơ̆ng kơ Saudi Arabia tŏ tơring, mă kăl lơ̆m khul Arab păng Hồi giáo; hmach chơt hơ iă dôm tơdrong jơnei atŏk tơ iung kơ Saudi Arabia lơ̆m tơlĕch jang kiơ̆ rim trong tơlech jang lơ̆m Trong lăng truh 2030 păng lui akhan, Ƀok pơtao, Khul kơdră chĕp pơgơ̆r teh đak păng kon pơlei Saudi Arabia gô hơnơ̆ng iŏk đei jơnei tih tên hloh dơ̆ng lơ̆m tơ iung pơjing păng atŏk tơ iung teh đak.