Tơ̆ ‘măng tơƀơ̆p, ƀar ‘nu kơdră chĕp pơgơ̆r hôn bơnê kơtang dôm tơdrong iŏk đei jơnei lơ̆m tơgoăt tơgoăl Jang hơdoi gĭt kăl tôm tong Việt Nam - Mi lơ̆m khei năr ou ki. Ƀar păh drơ̆ng minh nơ̆r hơnơ̆ng iung jang hơdoi kơjăp vă ba tơgoăt tơgoăl ƀar teh đak sa roi atŏk tơ iung kơtang, tơpă, sơđơ̆ng păng kơjăp ‘lơ̆ng, trŏ lăp hăm tơdrong đei iŏk yoa ăn kon pơlei ƀar teh đak, tơgop kơtang ăn rơngei hiôk hian, jang hơdoi păng atŏk tơ iung kơjăp ‘lơ̆ng tơ̆ tơring păng lơ̆m apŭng plĕnh teh.

Găh kơdih kou, Ƀok kơdră tơm Mi sơkơt hơdăh, lăng kơjăp tơgoăt tơgoăl jang hơdoi tôm tong hăm Việt Nam; hôn bơnê kơtang hơnăp jang, hơnih dơ̆ng roi năr roi kơtang kơ Việt Nam adoi nhen dôm tơdrong hơdrin đơ̆ng Việt Nam găh hơmet pơ ‘lơ̆ng, plôih ‘măng, mơ̆t hơdoi, tơplih ‘nao mŭk drăm kơtang. Kơdră chĕp pơgơ̆r teh đak Mi sơkơ̆t hơdăh tơgŭm djru hơnăp jang tơm kơ ASEAN; hôn bơnê kơtang tơgop đơ̆ng Việt Nam ăn rim tơdrong lơ̆m tơring păng lơ̆m apŭng plĕnh teh.