VOV4. Bahnar - Pơgê năr 15/6, Kơdră chĕp pơgơ̆r Tĕh đak Nguyễn Xuân Phúc bơ̆ jang hăm Khŭl kơdră chĕp pơgơ̆r Đảng dêh char Quảng Bình. Lăp đơ̆ng rŏng mơ̆ng khŭl kơdră dêh char tơroi tơbăt păng rim hơnĭh tơm, hơnĭh bơ̆ jang pơma tơgop nơ̆r, iung pơma pơrô̆ tơ̆ jơ bơ̆ jang, Kơdră chĕp pơgơ̆r Tĕh đak Nguyễn Xuân Phúc hơlen, khei năr au ki, Dơnŏ anĭh Đảng, kơdră chĕp pơgơ̆r păng kon pơlei dêh char jang ‘lơ̆ng tơgoăt tơgoăl, jang kiơ̆ kơ jăp Tơdrong tơchơ̆t Pơm lêh hop akŏm Đảng dêh char ‘măng mă XVII, hơdrin iung jang iŏk đei hơdăh. 

Kơdră chĕp pơgơ̆r Tĕh đak Nguyễn Xuân Phúc bơ̆ jang hăm Khŭl kơdră chĕp pơgơ̆r Đảng dêh char Quảng Bình

Quảng Bình đei rơvơn vă pơjing cham gre păr, dơnŏk duk, đei mŭk drăm cham char apŭng plĕnh tĕh, đei tơring sơlam tĕh đak, kăl đei trong jang lăng đunh đai lơ̆m aŏk tơ iung. Lơ̆m atŏk tơ iung mŭk drăm tơpôl, Kơdră chĕp pơgơ̆r Tĕh đak Nguyễn Xuân Phúc akhan, dêh char kăl akŏm 4 tơdrong jang tơm ‘nŏh tơmang pơ hiơ̆, chŏh jang sa hơgei, tơ iung pơjing hơnĭh jang kmăi kmok păng atŏk tơ iung kơ jăp jang mŭk drăm đak dơsĭ. Lơ̆m au kăl lăng kơ jăp găh tơdrong kon pơlei lơ̆m dêh char đei lơ măt bơngai erĭh sa tơ̆ tơring chŏh jang sa.

Tơblơ̆ nơ̆r: Amazưt