VOV4.Bahnar - Kơsơ̆ năr 22/3, tơ̆ Hơnĭh bơ̆ jang Kơdră tĕh đak, Kơdră chĕp pơgơ̆r Tĕh đak Nguyễn Xuân Phúc, Kơdră Dơno anĭh chĕp pơgơ̆r tơ iung pơjing Tơdrong vă jang “ Trong jang kăl tơ iung pơjing păng pơm pơkeh Tĕh đak pháp quyền xã hội chủ nghĩa Việt Nam trŭh sơnăm 2030, lăng trŭh sơnăm 2045” hlôi đei tơ ƀơ̆p mŭh măt rim bơngai joăt jang, bơngai jang khoa hŏk, rim bơngai jang lơ̆m Khŭl chĭh tơlĕch tơ iung pơjing Tơdrong vă jang kăl au. Jơ tơ ƀơ̆p mŭh măt đei pơgơ̆r lăp đơ̆ng rŏng pơgơ̆r jơnei 3 ‘măng hop akŏm tĕh đak tơ̆ 3 tơring Tu-Tŏk bŏk-Pơbăh kơ yuơ Dơnŏ anĭh chĕp pơgơ̆r tơdrong vă jang au pơgơ̆r, akŏm kơ hrĕng nơ̆r pơma, nơ̆r tơgop đơ̆ng rim bơngai jang, bơngai jang chă tơchĕng hơlen, khŭl kơdră chĕp pơgơ̆r tĕh đak, bơngai khoa  tơm dơnơm kơ tĕh đak găh rim tơdrong đei ƀơm trŭh tơ iung pơjing păng pơm pơkeh tĕh đak pháp quyền xã hội chủ nghĩa Việt Nam. Iung pơma tơ̆ jơ tơ ƀơ̆p, tang măt ăn Dơnŏ anĭh chĕp pơgơ̆r, Kơdră chĕp pơgơ̆r Tĕh đak Nguyễn Xuân Phúc hôn bơnê kơtang dôm tơdrong iŏk đei jơnei lơ̆m chă tơchĕng hơlen, pơtôch bơ̆ jang trŭh khei năr au, adoi sơkơ̆t hơdăh kơrŭn đĭ jơhngơ̆m, atŏk kơtang hlŏh dơ̆ng iung bơ̆ jang sơđơ̆ng ăn ‘lơ̆ng ăn bơ̆ jang tơ iung pơjing tơdrong vă jang.

Tơblơ̆ nơ̆r: Amazưt