VOV4.Bahnar - Lơ̆m ‘măng năm tơmang tĕh đak Singapore, lơ̆m năr 25/2,  Kơdră chĕp pơgơ̆r Tĕh đak Nguyễn Xuân Phúc sơng pơma dơnŭh hăm kơdră chĕp pơgơ̆r mĭnh ƀar Grŭp jang tơm kơ Singapore lơ̆m tơdrong jang unh hơyŭh, atŏk tơ iung tơring kơdrơ̆m; tĕch mơdro tĕh, tơ iung pơjing ming man hơnĭh jang kmăi kmŏk ... Sơng pơma dơnŭh hăm Kơdră chĕp pơgơ̆r Grŭp jang Kappel, Kơdră chĕp pơgơ̆r Tĕh đak Nguyễn Xuân Phúc hôn bơnê kơ tang kơ Grŭp jang hlôi tơmơ̆t jên jang iŏk đei jơnei tơ̆ Việt Nam lơ̆m khei năr au ki, athei Grŭp jang tơmơ̆t jên jang lơ̆m Việt Nam găh rim tơdrong jang tơmơ̆t jên jang ŭnh hơyŭh, trong hnam păng tơring kơdrơ̆m gơ̆h hơgei. Rim tơdrong vă jang kăl đei tĭh, tơplĭh ‘nao tơchăr, đei lăng să tơ̆ Việt Nam. Sơng pơma dơnŭh hăm Grŭp jang tơm Singapore, Kơdră chĕp pơgpơ̆r Tĕh đak sơkơt hơdăh: Việt Nam pơtrŭt rim hơnĭh mơdro sa Singapore tơmơ̆t jên jang tơ iung pơjing trong hnam, ŭnh hơyŭh, hơnĭh jang kmăi kmŏk pơm tơlĕch tơmam drăm, chŏh jang sa hơgei, kmăi kmŏk kơtơ̆ng ang, tơring kơdrơ̆m gơ̆h hơgei, bơ̆ jang jên hu, hơnĭh mong jên. Pơma hơdăh, pơtrŭt kơtang tơmơ̆t jên jang ‘nŏh jing mĭnh trong jang tơm a kơ Việt Nam lơ̆m khei năr kơnh, Kơdră chĕp pơgơ̆r Tĕh đak athei Khŭl Mơdro sa Singapore hơnơ̆ng jing gơng tơrŏh pơtrŭt kơtang Hơnĭh mơdro sa Singapore tơmơ̆t jên jang tơ̆ Việt Nam, tơgop hơnhăk tơgoăt tơgoăl ƀar tĕh đak kơtang hlŏh dơ̆ng.

Tơblơ̆ nơ̆r: Amazưt