VOV4.Bahnar - Lơ̆m ‘măng vang Hop akŏm tơ ƀơ̆p dôm bơngai tơơ̆t jên jang lơ̆m rim apŭng Củ Chi păng Hóc Môn, pơlei tơm Hồ Chí Minh, pơgê năr 12/4, Kơdră chĕp pơgơ̆r Tĕh đak Nguyễn Xuân Phúc năm tơmang Hơnĭh jang kmăi kmŏk hơgei pơlei tơm HCM.

Kơdră chĕp pơgơ̆r Tĕh đak năm tơmang Hơnĭh jang kmăi kmŏk hơgei pơlei tơm HCM

Lăp đơ̆ng rŏng tơmang lăng rim hơnĭh jang, Kơdră chĕp pơgơ̆r Tĕh đak Nguyễn Xuân Phúc hôn bơnê kơ Hơnĭh jang au hlôi hơdrin jang iŏk đei kơ jăp, jang kiơ̆ hơnăp jang ư̆h khan lăp atŏk tơ iung chŏh jang sa hăm kmăi kmŏk hơgei kơ pơlei tơm Hồ Chí Minh mă lei oei tơgop kơtang atŏk tơ iung chŏh jang sa tơring Đông Nam Bộ păng tơring Pơmơ̆t Tây Nam bộ. Kơdră chĕp pơgơ̆r Tĕh đak tơbăt, Hơnĭh jang chŏh jang sa kmăi kmŏk hơgei pơlei tơm Hồ Chí Minh ‘noh 1 lơ̆m 10 hơnĭh jang kmăi kmŏk hơgei lơ̆m tĕh đak kơna đei lăng hơtăih hlŏh dơ̆ng, hlôi pơm jŭk lơ̆m chŏh jang sa, rong ka hơdang, jang sa trŏ lăp hăm tơplih tŏ ‘mi kial, chŏh jang sa tơring kơdrơ̆m. Hơnĭh hlôi jang kiơ̆ trong jang hơgei lơ̆m rong hơdang păng lơ tơdrong chŏh jang sa anai; tơgŭm djru kơtang ăn bơ̆ jang pơjing đei hơnĭh mơdro sa hle, pơtho tơbăt jang kiơ̆ kmăi kmŏk.

Tơblơ̆ nơ̆r: Amazưt