Pơgê năr 16/11, Kơdră chĕp pơgơ̆r Tĕh đak Nguyễn Xuân Phúc păng akăn ƀok hăm Khŭl Kơdră kơpal tang măt Việt Nam hlôi năm trŭh tơ̆ Hơnĭh tơm Bangkok iung năm tơmang tĕh đak Thái Lan păng vang Hop akŏm rim Kơdră chĕp pơgơ̆r jang Mŭk drăm Pơma dơnŭh jang hơdoi mŭk drăm châu Á-Thái Bình Dương (APEC) ‘măng mă 29 kiơ̆ nơ̆r krao hơvơn đơ̆ng Thủ tướng Thái Lan Prayut Chan-o-cha.

Tơ̆ kơsơ̆, Thủ tướng Prayut Chan-o-cha hăm hơkăn ƀok pơm tơm pơm lêh sơng Kơdră chĕp pơgơ̆r tĕh đak Nguyễn Xuân Phúc hăm hơkăn ƀok. Đơ̆ng rŏng ‘nŏh ƀar ‘nu kơdră pơgơ̆r pơma dơnŭh dôm tơdrong tĭh hơnơ̆ng hơmet pơ ‘lơ̆ng tơgoăt tơgoăl jang hơdoi gĭt kăl atŏk kơtang păng lang să hlŏh dơ̆ng tơgoăt tơgoăl dĭh băl. Ƀar ‘nu kơdră jei gô vang năm pơm lêh kĭ pơkăp lơ hla bơar tơchơ̆t jang hơdoi gĭt kăl kơ ƀar tĕh đak. Tơchĕng hơdrol, lơ̆m ‘măng iung năm tơmang au, Kơdră chĕp pơgơ̆r Tĕh đak Nguyễn Xuân Phúc gô vă pơma dơnŭh hăm Kơdră chĕp pơgơ̆r Kuô̆k hô̆i Thái Lan Chuan Leekpai, tơƀơ̆p mŭh măt rim hơnĭh mơdro sa gơ̆h hơgei kơ ƀar tĕh đak păng kon pơlei Việt tơ̆ Thái Lan.