Vov4.Băhnar - Pơgê năr 17/1, tơ̆ pơlei tơm Đà Nẵng, Dơnŏ anĭh chĕp pơgơ̆r Tơdrong vă jang “Trong jang kăl tơ iung pơjing păng pơm pơkeh tĕh đak XHCN Việt Nam trŭh sơnăm 2030, lăng trŭh sơnăm 2050” pơgơ̆r Hop akŏm tĕh đak hăm hơnăn: “Hơnơ̆ng atŏk kơtang, atŏk jơnei hơmet pơ ‘lơ̆ng tư phap ƀlep hăm tơdrong ‘mĕh vă atŏk tơ iung păng tĕh đak XHCN Việt Nam trŭh sơnăm 2030, lăng trŭh sơnăm 2045”. Kơdră chĕp pơgơ̆r Tĕh đak Nguyễn Xuân Phúc, Kơdră Dơnŏ anĭh chĕp pơgơ̆r tơ iung pơjing Tơdrong vă jang pơm tơm hop akom. Iung pơma tơ̆ hop akŏm, Kơdră chĕp pơgơ̆r Tĕh đak Nguyễn Xuân Phúc hôn bơnê kơtang rim kơdră tang măt pơma tơlĕch lơ nơ̆r tơgop gĭt kăl, pơm hơdăh tơdrong kăl vă xek tơlang kơ trong jang hơmet pơ ‘lơ̆ng tư phap ‘nao, mĭnh lơ̆m dôm tơdrfong tơm kơ Tơdrong vă jang au. Drơ̆ng nơ̆r hăm rim kơdră tang măt vang tơgop nơ̆r, Kơdră chĕp pơgơ̆r Tĕh đak akhan, lơ̆m khei ‘năr plei tĕh tơplĭh ‘nao, vang mơ̆t hơdoi apung plĕnh tĕh, mŭk drăm kơsô̆, tơpôl kơsô̆ păng đei ƀơm kơtang đơ̆ng iung jang gơ̆h hơgei kmăi kmŏk ‘măng mă puăn trŭh rim tơdrong erĭh sa tơpôl, tơdrong kăl đei tơlĕch ăn ‘nŏh hơnơ̆ng hơmet pơ ‘lơ̆ng kơtang tơdrong jang tư phap Việt Nam.

Tơblơ̆ nơ̆r: Amazưt