VOV4.Bahnar - Sơng iŏk nơ̆r krao hơvơn đơ̆ng Kơdră chĕp pơgơ̆r Tĕh đak Nguyễn Xuân Phúc, Kơdră tơm Singapore Halimah Yacob (Ha-li-ma Gia-cốp) hăm klo yă chĕp kơ̆l Khŭl kơdră tang măt Singapore năm tơmang Việt Nam đơ̆ng năr 16-20/10/2022. Pơgê brei, năr 17/10/2022, pơm lêh đei pơgơ̆r tơ̆ Hơnih bơ̆ jang Kơdră chĕp pơgơ̆r Tĕh đak.

Ƀar ‘nu kơdră chĕp pơgơ̆r vang năm pơm lêh kĭ pơkăp, pơjao dĭh băl hla bơar tơchơ̆t jang hơdoi ƀar păh ƀar tĕh đak

Lăp đơ̆ng rŏng pơm lêh sơng, Kơdră chĕp pơgơ̆r Tĕh đak Nguyễn Xuân Phúc hlôi pơma đam hăm Kơdră tơm Singapore.  Tơ̆ pơma đam, pơma dơnŭh găh mĭnh ƀar trong jang hơdoi tĭh lơ̆m khei năr kơnh, ƀar păh drơ̆ng mĭnh nơ̆r hơnơ̆ng atŏk kơtang ăn khŭl  Kơdră kơpal tơƀơ̆p dĭh băl păng vei kơ jăp rim trong jang hơdoi kăl kơ khŭl Đảng, Tĕh đak, Khŭl kơdră chĕp pơgơ̆r Tĕh đak, Kuô̆k hô̆i păng Kon pơlei năm ngôi dĭh băl, jang hơdoi hơnĭh mơdro sa. Kơdră chĕp pơgơ̆r Tĕh đak athei Singapore pơjing rơvơn hlŏh dơng ăn tơmam drăm Việt Nam nhen tơmam drăm chŏh jang sa ka hơdang, tanh mei, tơmam drăm sa kmăi kmŏk pơm tơlĕch đang ...hơnơ̆ng đei tĕch mơdro tơ̆ Singapore; tơgŭm Việt Nam vang tĕch mơdro kơtang lơ̆m plei tĕh. Pơma dơnŭh găh tơdrong lơ̆m tơring păng apŭng plĕnh tĕh, ƀar ‘nu kơdră chĕp pơgơ̆r sơkơ̆t hơdăh dơ̆ng trong bơ̆ jang kơ ASEAN găh Biển Đông păng tơdrong kăl kơ vei kơ jăp rơngei hiôk hian, sơđơ̆ngdơ̆ng kơ jăp, duk kơdau, gre păr chă par hiôk hian; xek tơlang ‘lơ̆ng hơ iă dôm tơdrong tơgar dĭh băl, trŏ lăp hăm khôi luơ̆t apŭng plĕnh tĕh, pơ đĭ Tơdrong pơkăp Liên hợp quốc găh Khôi luơ̆t đak dơsĭ (UNCLOS) 1982.

VOV/Amazưt tơblơ̆